合桃酥~迷你版 (內附食譜)

我好鍾意食〝合桃酥〞，有次見到〝小魚仔~迷你合桃酥〞已經想整，尋日又見到〝Grace~迷仔合桃酥〞整左，今日骨痛冇回去湊阿B，所以今日〝的〞起心肝整。

我係跟〝小魚仔~迷你合桃酥〞做，因為個焗爐有別，所以焗既時候我改左少少，並將材料糖漿改為蜜糖。

第一批：

跟原食譜焗完個底〝淋〞，而面顏色唔夠，再焗耐D，仲差個底都係〝淋〞，再用大D度數放低層焗，雖然，有改善，但都係〝淋〞，所以我放棄等佢自己用本身熱力令佢變硬。由於第一次整，可能壓得大力得滯好易散。

第二批：

有第一批經驗第二批就好好多喇！我將度數調大左又放中層焗，一次過攪掂焗好。

兩批放涼後分別試過味，第一批脆帶點〝淋〞，而第二批就脆脆，好似街外的。

迷你合桃酥

材 料：(17個份量)

低筋粉 (篩好)                150g 

梳打粉 (篩好)               2g

泡打粉 (篩好)               4g

水                                  15g

砂糖                               76g

固體菜油  / 豬油          76g

雞蛋 (打散)                   11g

蜜糖                               4g  (原食譜：糖漿)

合桃                               適量 (我沒有落)

掃面：

蛋黄液                           適量

油                                   少許

做 法 ：

1.          首先要預熱焗爐170度火/ 15分鐘及低筋粉、梳打粉、泡打粉(篩好) ~ 備用。

2.          將固體菜油 + 砂糖放入缸內用 (1號速) 打發至變成乳白色及糖完全溶。

3.          加入雞蛋 (打散) 用 (1號速) 攪拌勻 ，再加入糖漿 + 水攪拌勻 。

4.          加入巳(篩好) 低筋粉 + 梳打粉 + 泡打粉用 (1號速)攪拌勻及變成粗粉狀。

5.          將麵糰分成( 每粒重20g)à 搓圓 à 壓扁 à 用手指在麵糰中央位置按孔。

6.          用蛋黃液+油à 掃在麵糰上à放上合桃à再放入已預先鋪牛油紙在焗盤上。

7.          放入焗爐 (中層) 以 170 度火 / 焗27 分鐘 ( 請留意焗爐 ~ ) 。