挽回信心~金寶焗芝士白汁長通粉 (內附食譜)

原本我都冇諗住寫這篇網誌，但係我今日的〝芝士長通粉〞令我挽回信心，所以令我有衝動寫出黎。

尋日我與老公每人一兜，但係老公都吃左一半，而我就食左1/3，因為汁唔夠好乾，我與老公都覺得唔好食，仲覺得自己整這款簡單款式越黎越難食，真係冇乜心機。

今日我就再去買多罐〝金寶湯〞做汁，我一向都係用〝金寶湯〞當白汁~方便快捷。再將尋日用剩的煙肉全部爆到〝脆卜卜〞，因為老公鍾意食。嘩！好多汁、好味好多，老公覺得唯一不足是芝士不夠香，因為買唔到〝Parmesan Cheese〞冇法喇！用左普通片裝〝卡夫芝士〞。

金寶焗芝士白汁長通粉

材料：

長通粉                            1包

金寶湯 (任何味道)       2罐

水                                    1罐

配料：

煙肉                                1包

磨菇 (切片)                   1罐 (大)

雞扒                                1塊

雞扒醃料：

糖                                    少許

鹽                                    少許

豉油                                少許

老抽                                少許

生粉                                少許

油                                    少許

麻油                                少許

胡椒粉                            少許

做法：

1.            將雞扒洗淨，抺乾水，再醃雞扒，備用。

2.            長通粉出水，備用。

3.            將一部份煙肉爆炒至〝脆卜卜〞，備用。

4.            配料分別爆香後，加入長通粉一起炒勻，再加〝金寶湯〞和水兜勻。

          *試味，若味道不夠，再加味。

5.            再放入錫紙兜內，舖上芝士。  

6.            用250℃焗15分鐘或芝士微燶。

7.            最後放上煙肉焗多一陣，即成。