梅菜燜腩肉 (內附食譜)

今日我與老公去左老爺家吃晚飯，但吃乜餸一切由我話事，我知老爺鍾意食〝梅菜扣肉〞，每次出外吃飯都會order，所以我跟〝蘇民峰〞本烹飪書整下類似既野。

尋日我去左阿媽幫襯開果檔買〝梅菜〞，我買既係〝甜梅菜〞，我怕買鹹既會太鹹。用唔慣個廚房，所以有少少炒燶左。我一向都唔吃這類野，所以都唔知我整得好唔好食，不過，我聽左老公與老爺既食後感，就試左一舊仔。

食後感：

我：鹹左D，夠腍。
老爺：好味，甜左D，夠腍。
老公：麻麻地，因為佢唔鍾意食，唔夠腍。

老爺覺得甜，我諗若果用鹹梅菜，就會合佢口味，但我就覺得鹹，這個鹹度我可以接受。

梅菜燜腩肉

食譜來自：So Romantic Kitchen~蘇民峰‧Lilian密蜜煮

材料：(2-4人用)

五花腩               10兩

鹹梅菜               1件 (大)

蒜頭                   2粒

米酒                   1湯匙

調味料：

生抽                   3湯匙

老抽                   2湯匙

糖                       1湯匙

鹽                       1/2茶匙

做法：

1.          五花腩洗淨，切件。

2.          鹹梅菜洗淨，浸水片刻，切成小塊。

3.          鍋中燒熱1湯匙油，下蒜頭炒香，放入梅菜及腩肉炒5分鐘，贊酒，拌至酒味消失，加入調味料，注入清水至浸過面，煮滾後轉慢火燜1小時即成。

入廚錦囊：

l        如用甜梅菜烹調此菜式，可下鹽略醃。