沙嗲牛肉湯意@老公想食

我一早已同老公講左今晚唔會煮飯或整野食，我諗唔講大家都知喇！晏晝老公來電〝今晚會約6點收工，想食沙嗲湯意〞，我見老公想我煮就煮比佢食喇！

老公約7點放工，咁我就同佢一齊食喇！雪櫃仲有2條腸，就烚埋佢。我非常滿意今餐，估唔到老都好滿意，佢成日都話OK，今次仲讚好味、好食添啵！我聽到佢咁讚我，真係開心到暈丫！仲好食過街果D，不過，老公都有批評既，就係沙嗲汁濃左D和油左D。

今晚我整呢餐真係好鬼懶，簡直係〝懶到一流〞，因為乜都係買現成，係得牛肉自己切和醃，但個汁我加左水，都有係咁易調味既。上次整過〝沙嗲醬〞，但我想整再簡單D，上網搵又冇乜人整，於是係〝Taste〞搵到現成醬汁，個湯都係買現成火鍋湯底。

我成日上網後1、2個鐘就會斷線，這個問題已經維持左1年有多，每次都要熄左個modem和wireless router先可以再上網，上星期聯絡左〝網上行〞，約左今朝9點至11點來修理。

十點幾等到師傅來電盡量11點前到，因為我早上要回公司拎機，再出街。我見師傅好趕忙，整完我問佢有冇野要簽，佢趕到名都唔駛我簽就走人。原來師傅朝早時間好趕架！下次都係約晏晝或者夜晚先。

我個〝Now TV〞十年來都係冇睇過，每次搬都會有師傅來駁，都係唔知咩問題睇唔到，我地見得免費台睇，所以一直冇理，遲D搬定先會join plan。頭先叫師傅順手睇埋，吖~唔知點解今次一插就得，電器既野真神奇。

我諗住11點幾落街行，但頭先阻一阻就2點先去。我又再去行書局，然後再到〝Taste〞入貨，尋晚老公order左我要買乜野，我又再入下其他貨，我見價錢樣樣都貴左，咁買一買埋單都唔平，之後再去藥房買條紙巾，不過，D野好重整到我膊頭有D痛。

返到去有D肚餓，諗住食左幾塊薯片頂住，因為想執埋頭先入貨D野，但執執下都係唔得，坐低食塊包再執過，執完又曬衫，再用手洗老公新買既運動褲，因為佢怕會脫色。