房署配房@第二次

早在半年前獲配房於〝環翠邨@第一次〞，但對我地來講太遠，果次職員好人唔駛我地去，只係信面通知就可以，仲可以寫我地想要邊區，老公從小到大都係係〝東九龍〞，所以寫左〝東九龍〞。

兩星期前肥阿哥收到房署信，係關於第2次配房事宜，就立即通知我，真係如老公所願派〝東九龍〞，之後我、熊貓姐姐和至Fit姐姐係〝Trandyland‧美亞@開倉〞當日去過，但唔係預約日期唔上得去睇。

其實，我與老公都會拒絕這次配房，因為我覺得間屋太open，又冇privacy，層數又低，地址係3樓。間屋左邊係小學，只是一條小路仔距離，前面行幾步就到中學，另外果2邊就係村內馬路。以前小時候搭巴士都會經過呢條村，從巴士上都可以望入屋，屋內一切都會睇到晒，所以我一向對這條村感覺唔多好。

今日就係房署約見日期，但係早上9點半就要去到，所以我今朝6點半就起身，然後去到附近先食早餐。老公吃豬扒餐，我就食普通火腿通，而最特別就係隻杯，因為我好少見。

我地9點鬆D到達，過左約定時間都未見，心諗9點半都未見就去催下先，約9點半就有人帶我地去睇屋，但我地既單位翻新進行中未有Key，所以去左同一座向，但高幾層既屋。

• 我一入到去大堂已有壓迫感，因為樓底矮。


• 搭電梯進入走廊，仲覺得似入左監倉，因為兩家人打對面，咁就成一對喇！而每一對就有一個鞏門，望埋去就有好多度鞏門。


• 每家人既大門上，都有1/4度門既磨砂玻璃，我見每家人裡裡外外都用野遮掩住。


• 相隔走廊和屋內的窗，嚴格來講唔係窗，只係砌左一舊舊玻璃磚，而每舊玻璃磚都有一條約闊5吋的隙，可以伸得入一隻手，我見每家人都係自己用報紙或其他野塞住。


• 騎樓與外牆又有兩條好大既隙，老公話以前係用來通風的，呢兩條又要自己封。

今次派3樓，原來實質係2樓，仲要係最邊果間，上次派2樓，原來係1樓。不過，都有好處既，就係街芳和鄰居都好，帶我地睇樓既又好人，我地想去獲配單位外偷望入去，佢又肯啵！對面鄰居話借櫈我地望入去，但我地身手咁好緊係唔駛喇！間屋好污漕，天花板好似被煙燻黑，老公話係塵來的。我地行過2層，見到的鄰居都係老人家。

之後又見埋個主任，呢個主任又好好人，大家傾談左一輪，今次我地直頭寫埋要邊區，將個〝東九龍〞範圍又縮細左，但未必會派到，又寫左要大D單位，因為日後會生BB，所以又係要〝等〞。

欲知後事如何請到：第43屆工展會 、滿足‧美味@金船長