沙嗲牛肉湯意~懶人版 (內附食譜)

今日我與高達叔叔相約去影相，去影之前我、老公和高達叔叔一齊食野先。上次老公吃過〝沙嗲牛肉湯意@老公想食〞之後念念不忘，所以叫我今晚再煮多次。

今次我又可以偷懶多一日喇！影完相再約老公一齊去買材料，高達叔叔不太喜歡吃〝沙嗲牛肉〞，所以佢覺得一般，但我與老公緊係覺得好喇！老公覺得美中不足，就係牛肉唔夠入味，因為我唔想太夜吃，所以醃牛肉既時間係不足，老公下次唔會架喇！

沙嗲牛肉湯意~懶人版

材料：(3人份)

牛肉                               0.58磅

洋蔥 (小)                       半個

意粉                               2 1/4份(意粉量器)

沙嗲牛肉醬                   2包

瑤柱海鮮火鍋上湯       1包

醃料：

豉油                               適量

糖                                   適量

粟粉                               適量

油                                   適量

水                                   適量

做法：

1.          洋蔥切粒，備用。

2.          牛肉切片，然後用醃料醃15分鐘。

3.          煲內注入水，水滾後放入意粉，烚熟後啤水。(根據包裝袋上註明加1、2分鐘)

4.          將湯包倒入煲內，然後注入5-6杯水。(水多少可以參考湯包背面)

5.          湯底滾後放入意粉，待滾熄火備用。

6.          爆香洋蔥粒，下牛肉炒至8成熟，再落沙嗲牛肉醬炒勻。

7.          將意粉和湯放入碗內，然後將牛肉舖上面，即可。

貼士：

l        開左湯包後，我會用水撈埋剩下的醬，所以先倒落個碗到，會方便D。

l        若然覺得醬太濃可以加水，然後埋個獻就可以。

l        湯底味道隨個人喜好，不一定要跟從。