中西合壁@2008聖誕前夕

今日係聖誕前夕，我都諗住係娘家吃埋飯先走，但經過頭先一役後，我都唔多想再留係娘家，又係為左阿B與老豆吵野，有興趣就轆到最底睇。

我激氣得滯，所以忘記左今日停食水，要到6點先有，但我4點幾回家，係大堂見到有人挽水，心諗唔通有意外6點都未水嚟！返到乜都唔做得，得個〝等〞字，好在6點幾有返水，立即動工。

老公公司個倉搬去另一到，所以好夜先放工，佢叫我自己諗煮乜食，繼上次冬至食西餐，今日聖誕前夕就中西合壁，來一個〝叉燒火腿蛋炒飯〞和〝吞拿魚薯蓉〞。

這幾日來老公已身體有D不適，尋晚食左粒藥就早眠，頭先又話喉嚨有D痛，又話有D發燒，佢食食下炒飯話咽不下，轉只吃薯蓉，最後兩樣都係食唔晒，而家存放係雪櫃，都唔知有冇機會食。

頭先老公講左一樣好嘔心既野我知，話說老公放工等紅Van，已聽到後面有名男子不時自言自語，有時好大聲好似叫囂咁。有車來老公上車坐最後，該名男子上到車與老公同坐，老公仲要坐裡面，男子對住老公咳左兩聲，被老公〝啤〞住，佢就向單座既女子咳。

突然該名男子話〝唉~喉嚨好似有D發炎喎！〞，之後〝Hurt Hurt〞兩聲就吐左D啖係手掌到，將啖玩弄鼓掌之中，有時又抺落櫈底和座位上。

男子又突然講野〝哎呀~好似想嘔〞，個人不停搖晃，真係好似想嘔咁。老公平時落車個站有好多人落車，人落得七七八八男子突然坐左去司機後面，但老公都冇落車，係下個站先落。老公話單座位個女仔都想落車，但見個男子去左前面，所以都冇落。

老公話該明男子又肥又高，若果佢將D啖抺落佢到，就算唔夠打都會打佢，同埋佢話〝敵不動我不動〞，因為老公要落車一定會touch到抺係櫈既啖，該男子太肥據本佢對腳貼住張櫈，簡直密籠，老公攝都攝唔到出去，所以男子唔郁佢唔郁。

我與老豆吵野事件：

佢地成日都閂街門，而家天氣凍更加喇！只係得騎樓開半邊窗，有時再凍D閂剩條隙仔，而且D風都唔入到廳，咁樣空氣一D都流通，又會困晒D菌係屋內，所以我每次入門後都唔閂大門的。而家家中已有3人病左，分別為肥仔、娣婦和阿B，阿B仲流好多鼻膏，係佢地一家3口嘞！

尋日老豆已經〝依依哦哦〞，話阿B病要閂大門，我只係講〝咁樣流通，困晒D菌係屋到。〞，我又帶左阿B出街買野，我地去左1個鐘，阿B流鼻膏比屋企少。

今日我一入門口又開大門，老豆又〝依依哦哦〞，話阿B病要閂門，過多陣阿B又流鼻膏，老豆又話〝今朝都冇流既，係而家先流〞，佢講左幾次我終於忍唔住，就係咁就吵野，但係佢言詞間話我，佢話每次阿B病都係我一手做成，又話我整到阿B身體咁弱。

我都知〝公說公有理、婆說婆有理〞，我講實係我有道理，所以我都唔係要大家認同我，我只不過係想發洩一下啫！