椰子圓餅 (內附食譜)

今日想整包、餅，所以又翻書睇下，但一D心水都冇，最後揀左〝椰子圓餅〞，其實，都有D唔想整呢款，因為要用椰漿，我知開一罐又用唔晒！又怕嘥，又想整，最後都係整左。

第一盤整未掌握到，所以整得好大塊，之後第二盤就好好多。焗時候好香椰子味，個心一直擔心唔知成唔成功呢？食過一啖後就知道~得左喇！明天會去老爺家，我整左18塊，會將一半明天拎去比老爺試下。

食後感：

我：我覺得好味，味道好似某牌子的〝椰子餅〞，某牌子的咬落去感覺是實的，而我的咬落去是鬆脆的。
老公：冇乜特別，麻麻地。

椰子圓餅

食譜來自：自家製曲奇小蛋糕~Home-make Cookies & Petit Cakes

材料：(份量約12-15塊)

無鹽牛油                 110克

砂糖                         80克

鹽                             1/8茶匙

全蛋                         20克

椰漿                         20克

低筋麵粉                 140克

泡打粉                     1/2茶匙

椰絲                         25克

舖面用材料：

椰絲                         適量

做法：

1.          先以170度預熱焗爐。

2.          牛油於室溫下軟化以【糖油拌合法】加入砂糖及鹽一起打發至鬆發變白。

3.          蛋打散後分2-3次慢慢加入打勻。再加入椰漿打勻。

4.          將已篩過的麵粉和泡打粉加入蛋糊中打勻，再加入椰絲一起打勻，最後後用手拌成麵糰。

5.          將麵糰平均分成小份搓成圓球狀，用大姆指將圓球稍微壓扁於紙模上。

6.          將餅連紙模放上焗盤內，再撒上舖面用椰絲。再放入焗爐以170度焗約20分鐘便成。

糖油拌合法：

1.          軟化牛油加入糖一起打發。

l          小貼士~打牛油發糖時可包上一張錫紙才打，這樣可避免牛油及糖打時會飛濺出來的煩惱。

2.          打發王絨毛狀。

3.          將蛋液分次加入拌勻。

4.          再加入食譜中的其他材料拌成麵糰。

小貼士：

l        因個別的焗爐溫度都有差異，焗約10分鐘後要留意小心椰絲會突易變燶。