Book場記@羽毛球 (上集)

以前〝康體通〞每日早上7點開始更新，所以到要book場打波前一個月果日，我就會6點幾起身，因為要同人鬥快。前排已想book場打返波，因〝08奧運〞免費好難book，而家過左免費book場時期，應該易好多。

今朝7點起身book場打波，但都未更新既？係咪update時間改左呢？我左搵右睇，真係改左係早上8點半更新，咁唯有等下喇！

我叫左老公起身，等佢出左門口，再煮早餐吃，一陣陪老爺去收屋，因為老爺申請左調遷，接下來應該又要忙老爺搬屋事宜。

我由7點等到8點半都未更新，入去有時好慢，又有時run唔到，仲以為更新左添！到9點開始直情入都入唔到，又專登裝個Printer，到我十點就要出門口都未得，我怕回來又full晒！真係令人焦急。

我搭巴士，再轉小巴去目的地，第一次去問左司機經，落車後行左過對面馬路，行到去商場就知唔對路，因為尋日睇地圖商場與目的地係相反方向，後來問左2個跑去目的地，路行左double咪當減肥。

我與老公會合後等左好耐先見我地，入左一陣又出返去等人帶我地去睇間屋，間屋都好是正，只係要舖地板就可以入住，當然要自行裝冷氣和煤氣爐喇！之後落返去再見職員，聽下租約事宜和填下野咁囉！但老爺冇帶相，老爺話職員冇提佢，職員聽到就話〝唔一定要人提架嘛！〞。

我地去〝快圖美〞唔可以即日拎，去左另一間15分鐘就取得，我地急急腳趕回去，回到去又要等，因職員見緊另一個戶主。我地入去交相，再傾多陣就攪掂，我與老爺再上去度尺，又傾下，諗住一陣與老爺出去睇下D料。

頭先等既時候打回家問下阿B點？老豆話阿B又痾又燒得好勁，離開辦事處又再打回去，佢地講到情況好嚴重，我無同老爺食飯，去左KFC買野食就坐巴士回去。

我預左今日會返屋企，所以我拎埋個〝迴轉式搗碎器〞出去。返到去阿B都冇乜野，但我湊住阿B未有時間教阿婆用，而且忘記拎D野。

剛才係娘家上網book場run唔到入去，我返回家再上網已睇到想要既日子，但未有得book既？阿嫂來電問左佢都會打，所以阿嫂就陪我一齊親身去book場，去到話要明天先有，因為只可預訂30日，噢~白行一趟添！明天又要再努力上網book場。

今晚又係食〝麥麥〞，不過，我試新野〝全新板燒烤汁豬柳包〞，但食過後都唔會有下次。