賽車日‧賭博日

我上星期一為左去〝酷熱@香港迪士尼〞就放左高達叔叔飛機，因為佢原本係來砌模型既，唯有改期為今日勒！

我地約左係馬會等，佢地每人一百蚊夾錢買馬，好耐都未試過咁喇！我地經過
〝7-11〞，高達叔叔入去買野比佢阿嫲，係門口見到日本巴士扭蛋機，但老公話唔扭都唔靚。高達叔叔出來時，係個袋到拎左呢架出來比老公，係佢尋日扭，佢唔係想要呢架！老公話唔靚比阿B玩喎！

我地行左一陣就去左食車仔麵，佢地就梗係飲奶茶喇！而我又係飲西瓜汁，冇上次咁好飲，唔知關唔關轉左人事呢？

食完野就去左〝冒險樂園〞，高達叔叔想去睇下D搖控車，諗住換3架，每人一架一齊玩。其實，幾乎每次見到我地都會問〝去唔去冒險樂園換搖控車玩？〞，因為佢見N年前有次我地3個一齊去街睇模型，我就買左3架Tomy搖控車，每人一架一齊玩，當時都百幾蚊一架，再行見到另一間又平D，夾埋都平成舊水，真係泵心。不過，高達叔叔一玩個轆就歪，而我架太耐冇玩發左霉，得返老公果架係正常運作。

終於換左3架喇！返到去高達叔叔唔係砌模型，而係同我地砌車，我地用雜物自製賽道，後來又整過另一條，今次用埋我個磅做左個斜台和平台添啵！

我與老公用〝頭文字D〞果兩架，送多幾隻雪糕筒，而高達叔叔果架！就送多個甩尾轆。

由於要睇〝家好月圓〞既關係，所以我地7點就落街食飯，食完飯高達叔叔就要走，因為佢要出去與朋友睇波。

高達叔叔既〝鹹魚雞粒炒飯〞好香鹹魚味，而我既〝豬扒炒公仔麵〞好味。老公碟飯來既時候，我望住老公碟飯問左2次‧‧‧

我：係咪豉椒牛肉炒河？
老公：(望住我又望下碟野~冇答)
我：係喎！係喎！(彷然大晤)
老公：你咁問我叫我點答你好呢？

跟住3個都係到大笑。今晚老公唔知做乜，突然要開facebook，仲問我有冇用添！我梗係有喇！上年已經開左，不過，冇用之嘛！而家幫老公開facebook account。

今日老公與高達叔叔夾錢買馬和買左2條波飛，夾埋都係輸左50蚊，而我買左2場馬輸左20蚊，我唔係爛賭，平時唔買架！但若然買就會係買特定果場和果隻，即係我只係買死個場數和號碼，識我既人都知。