酷熱@香港迪士尼

今次係我第3次去〝香港迪士尼〞玩，頭2次都係唔駛錢，雖然，今次要錢，但都好平。

事原Benz哥哥有4張票，而肥阿哥又識人可以免費帶3個人入場。我地有8大1小，咁得7張票，所以我地得一個人要買票，而張票就由我、老公、肥仔和娣婦每人出1/4價錢再9折買，係咪好低呢？咔~咔~

〝香港迪士尼〞計埋今次我除〝馳車天地〞外，全部都玩晒！下次有機會一定要玩到。肥阿哥話要錢真唔來，唔駛錢就考慮下，而Benz哥哥話下次〝咪攪〞。

今日真係熱氣迫人，不過，都冇損我去見米奇既心情。平時我十點鬆D就會入到去，今次我地食埋野先入去，就比平時晏左D咁，一入到車廂就見到米奇喇！

今日比之前兩次少人。

我地入到去係〝美國小鎮大街〞見到米奇冇乜人排隊影相啵！我與阿嫂呢兩個米奇粉絲就即跑過去，點知米奇要走，叫我地1點55分去〝幻想世界〞影，咁我地入左去商店嘆冷氣先，跟住就坐火車入去〝幻想世界〞。

我地去到〝幻想世界〞又見米奇，去排隊先，排排下又話要休息15分鐘，乜咁黑架！D相係佢地行返嚟時影架！不過，影唔到米奇和米妮錫錫。老公話呢D卡通人物全部都係由女仔扮架！

一見到巴斯就知我地係〝明日世界〞喇！

我地玩完〝飛越太空山〞，雖然，係第3次玩都好驚，阿嫂係出面幫我地看守物品，肥仔和娣婦就係乘涼地方看守阿B覺豬。

我地去左〝巴斯光年星際歷險〞拎Fastpass，又去〝幸會史迪仔〞、〝馳車天地〞拎Fastpass，但同一時間同一個地方唔可以拎多過一次。

玩完〝飛越太空山〞都未夠鐘，所以我地就自行排隊玩。肥阿哥講我先知，原來架車可以郁左右架！只要郁車上既操控杆就可以。我玩完落車時，唔小心又摧到隻腳又瘀又痛，直徑都有6cm架！

老公有D肚餓，又撞啱巡遊去唔到〝皇室宴會廳〞，每次都係去呢間。我地就去試新野，去左〝彗星餐廳〞。果D只係吃包，又淨係得單餐和套餐，單餐成四十蚊，而套餐最平都要56蚊，所以呢餐又食左百幾蚊，仲要一D都唔好食。

食飽飽就去排隊睇〝幸會史迪仔〞，佢好得意架！好受小朋友歡迎。我地排隊時發生左打尖事件，大家都唔明個樣都好文明下架！點解會咁盟塞和打尖呢？

小小世界係我第一次去，不過，就有D失望，原來去坐下船咁，冇其他野玩，行去坐船未行到都兜到頭都暈。

我地又去左〝森林河流之旅〞，起初都係排廣東話，嘩~好長龍啵！阿嫂提意去排普通話，橫掂都係唔會聽佢講咩，最後我地去晒聽英文，跟住有廣播話英文仲有3分鐘上船，就有好多人過擋勒！

玩完時間都唔早，想係放煙花前走，但我今日都未有收穫，所以臨走前就再返〝美國小鎮大街〞逛一逛。

我一直都係太讚成買公仔，但呢隻有D特別意義，見到佢就令我諗起D野！所以就帶佢回家，但居然老公唔記得~激死我。仲買多件汗衫添，老公就買左罐〝古朱力、士多啤梨脆米〞，呢罐野好好味架！

香港迪士尼~街

香港迪士尼~商店

晚餐去左打邊爐，食完就散隊。