我和尋回犬的十個約定

13 September 2008

今日我與老公可以拍住拖去睇戲，好耐未試過喇！上年〝老公幫人、我得益〞，老公同事送左2張UA coupon比我地，老公一直都冇話要睇戲，尋日晏晝老公來電‧‧‧

老公：果兩張coupon明天到期，我地明天去睇戲。
我：睇咩戲丫？
老公：睇狗果套。
我：是但喇！

老公不論大與小既狗都怕，但佢唯一唔怕係〝金毛尋回犬〞，佢仲好鍾意添啵！之前高佬叔叔養左2隻狗，分別係曲架和金毛尋回犬，自從見過金毛後，老公就鍾意，仲好錫隻金毛添！每次去到都會主動摸和同佢玩，直到高佬叔叔將牠送比人，佢都唔捨得。老公覺得金毛好乖好馴，對佢唔會有殺傷力。

今日去睇戲前要陪阿B去〝幼兒導師@協康會〞，所以問娣婦和肥仔上完堂後就一齊去沙田行街，跟住食飯，然後我與老公就去〝沙田UA〞睇戲，佢地當然冇問題喇！

我地約好係食野地點等，不過，娣婦剛係公司食左月餅，所以冇食野。由於轉左廚師得幾樣選擇，我地就食左好難食既午餐，跟住就去〝協康會〞，上完堂肥仔提意行路去巴士，嘩！烈日當空，大家身都濕晒，仲要等車真辛苦。

上到巴士都冇乜冷氣，老公與肥仔坐車後，而我與娣婦就坐前面4個位，但我就係住倒頭位，陸陸續續有好多人上車，其他乘客都話熱，我見老公坐係肥仔與一名較肥胖女仕中間，鈍時變成沙甸魚。

巴士去到城隧有好多人落車，佢地由車尾行過來，我見老公件衫腰間打橫有水跡，肥仔又話熱到衫都濕晒，老公隨著人潮就去搵司機。

老公：可唔可以開大D個冷氣？
司機：set左冇得教。

老公就炒低左個車牌和司機員工編號，去到新城市老公就打電話去九巴反映，老公只係反映，並沒唔係投訴個司機，答覆係會叫維修人員去睇下。

我地去到租車後道揚鑣，肥仔與娣婦帶阿B去BB餐廳換片和帶阿B去食BB餐，而我與老公就去戲院換戲票，再回去找他們，我地睇〝我和尋回犬的十個約定〞夜晚9點半。

頭先lunch娣婦冇食野，離開BB餐廳，娣婦自行去買小吃，回來買左2杯雪糕，因為買2杯化算D，送左一杯給我吃。

我地再行多一陣就去食野喇！晚餐就係〝宜傢〞攪掂，嘩！成車都係野食，係咪好豐富呢？今日冇牛，所以我地係食〝豬扒配蘋果汁〞，味道一般肉質好〝鞋〞，比起煲湯豬肉還要〝鞋〞，而娣婦就吃〝燒煙鴨胸〞，阿B就緊係食兒童餐喇！仲有必點既肉丸。

晚餐食完就行一陣，再送佢地去搭車，巴士未開，我與老公就不停與阿B拜拜，車上既乘客都望住我地兩個傻瓜。

時間尚早，我地再去行下，我突然想食甜品，最快捷就緊係食雪糕喇！去到〝7-11〞冇軟雪糕，老公提意去〝麥麥〞食新地，我緊係冇問題喇！老公想要焦糖味，但而家停產，咁就與我一樣要士多啤梨，但要走花生。

食埋甜品就滿足到極點，時間又啱啱好。套戲都唔錯，有攪笑位和喊位，但喊位並不多，我只是去到尾聲，女主角拎住阿媽本晝簿時~才有喊。不過，配音就唔係好得，始終差D。