尋日終於買到個杯比阿B，所以我就用我部〝米奇標籤打印機〞印阿B個名貼係杯到，等佢拎返學校用，我仲印多幾個以防萬一，之前阿B個杯個Name Label都係用呢部機印架！
每次有節日，我都會自動請纓負責煮餸，但每次都會有爭吵。每次我話煮，阿媽都會話我煮得慢，但我都會爭取煮持人。
中秋將近明天屋企做節，我預備煮3個餸，其中一樣我最拿手，而且好受歡迎既春卷，阿媽原本都OK既，仲話佢可以唔駛煮餸添！因為佢叫左老豆炆冬菇，其實，佢邊樹煮丫！都係買燒味回來吃，最多都係炒碟菜。以前都唔係咁，真係會煮餸架！
我湊完阿B放學回來，阿媽又變卦，佢話我煮得慢，叫我淨係整春卷好喇！平時先再煮過喇！又話屋企雪櫃冇位擺，仲有好多隔夜餸，我聽到緊係發老脾喇！心想緊係冇位擺喇！都唔執雪櫃，多多都唔夠擺喇！
我一心諗住煮餐大家吃，肥阿哥都話次次回來都係食〝飯盒餸〞，咩係〝飯盒餸〞？咪就係燒味是也！肥仔上次都話好耐冇食過我整既〝無骨雞翼〞，不過，今次我唔會煮呢味。
我自己都好怕係屋企煮餸，我知自己煮得慢，已經盡快煮，但阿媽就會係側邊話煮得慢~依依哦哦，咁樣就會變成我既壓力，所以我次次都話下次唔煮，但次次都有煮。
我有時應承左煮，我緊係一早預計好幾點回去煮，若然係煮晚餐，阿媽3點幾見我未返就會不停來電問我幾點返去煮，就會攪到我好掹憎。唔知明天會發生咩事呢？
今晚我整無心之下整左〝鬆脆曲奇〞。
係咪個個呀媽都係咁架LA...
回覆刪除我煮餸..我呀媽都話嫌我慢...
係咁企0向隔離話自己點快.點快..
真係比佢激屎
[版主回覆09/09/2008 10:24:00]原來你阿媽又係咁，當你努力煮緊，但旁邊就有人〝依依哦哦〞，真係會發老脾和想食人架！ 有時真係為左咁唔想煮，但唔煮又冇啖好食，所以都好矛盾。
感覺到妳家好熱鬧呀! 我呢邊完全無節日氣氛 !
回覆刪除[版主回覆09/09/2008 10:26:00]通常外國都係冇中國既節日氣氛，不過，你可以同小豆釘、再生俠和奶奶圍內攪個小型賞月會，氣氛係冇咁好，但都好過冇丫！
好靚的米奇name label機...我都想買...但最後都冇買到...因為老公話冇用喎
回覆刪除[版主回覆09/09/2008 11:23:00]嘻~嘻~ 我係係冒險樂園換架！換完呢部之後都好少去玩lu。
小朋友真係好鐘意見到物件上有自己個名架 ~ ~ ~
回覆刪除[版主回覆09/10/2008 06:48:00]呢樣野我唔知道，可能有自己個字即係屬於自己。
我煮餸,係要關埋度門唔畀人睇,因為好怕畀人阻住晒.可能妳阿媽好似我咁,唔鍾意畀人掂佢啲嘢,怕畀人整亂,所以唔使妳煮.
回覆刪除[版主回覆09/10/2008 06:50:00]我以前煮餸都係要閉關架！不過，自己煮得慢，所以而家都冇，等朋友可以幫下手，快D有得食。我阿媽唔係怕人整亂D野，有人煮求之不得添！係因為我煮得慢，有排都冇得食，又冇得開冷氣咁啫！
個個阿媽都會話個女煮得慢, 哈..我阿媽都唔例外, 其實我都唔慢O架啦, 唔使一個鐘就有得食!!! 不過我阿媽真係好快, 半個鐘左右就有飯食, 所以暫時都仲未反駁到佢.
回覆刪除[版主回覆09/10/2008 18:37:00]你阿媽咁快既！真犀利~