食‧咳‧嘔‧痾@病四步曲

今日阿B係食完野就咳，咳完嘔，嘔完就痾，所以佢係食乜嘔乜，連飲水都隔一陣嘔返出來。

尋日已決定左阿B今日請病假，今朝四大長老帶左阿B去飲茶，食茶只係食左不多一湯匙〝鳳爪排骨飯〞，又飲左茶。回來時餵藥和食奶，晏晝我地吃粥佢都唔食，我食完就幫佢洗白白，然後訓晏覺。

1330-1340
阿B約1點就訓左，而我都隨後訓，我與阿B並排相隔2個身位。我訓訓下醒一醒，阿B郁、張開眼一陣就嘔奶和飯，我立即衝過去抱起阿B。之後阿B唔訓，又開左冷氣，所以著返長袖衫褲。玩左一陣就痾，便便有D唔多正常。

1515
我問阿B食唔食奶，佢〝嗯〞就去開奶，開左又唔食，玩玩下佢突然禁住肚仔踎係地下，繼而訓係地，然後嘔，嘔完一陣就痾。今日便便比上一次更加唔正常，係水狀加黏性咁！

1620
頭先我抱住阿B食左1安奶，我抱住嘔都易控制D，又嘔返出嚟又痾，可能肚餓佢即刻又要拎返支奶食，跟住又嘔，我整理好阿B，再向娣婦匯報多次，而家情況嚴峻左，問下帶唔帶佢去睇醫生。娣婦約左醫生6點，等肥仔和娣婦放工回來就立即去睇。跟住我就去洗白白，期間阿B又痾，好在有阿婆幫阿B換片，唔係個Pat Pat就慘。

我執好晒阿B既野，仲預備左幾個嘔吐袋添！等佢地回來就出發。

1815
出門口前飲左水，阿B係的士上又嘔，跟住又痾，的士司機立即開窗。我地去到〝港安〞去護士站磅重，嘩~阿B又瘦左好多，好快就有得睇。

醫生話暫時未知咩事，最緊要唔好脫水，留左便便去做化驗和種菌。可以留院，我地怕好似上次咁抽血和吊鹽水要吉好多個窿，醫生話呢到只係吉一個，抽血和吊鹽水都係同一個位做。

我都叫定醫生寫封信，以防萬一半夜要去急症室都快D，而且醫生都寫左3日假比阿B唔返學。頭先阿B好叻，醫生要睇口時，拎開佢奶嘴佢就張大口。

娣婦記起忘記對醫生講尋日食過打邊爐，拎完藥娣婦入去再搵醫生，今次又月睇左千幾蚊，我就係出面等，而肥仔就整阿B便便留做化驗。娣婦話同醫生講〝尋日打邊爐，不過，乜都未落就烚左個烏冬比佢食。〞，醫生話應該係打邊爐。

1900
我地坐的士回去，阿B又嘔返頭先D水出來，冇幾耐就訓左。若然真係要入院，佢地都想入〝港安〞，因為抽血和吊鹽水都係同一個位做，阿B又咁辛苦。肥仔都問定保險可以claim到幾多，好在阿B有買保險啫！住院有得claim。

我抱住訓左既阿B回去，就回去，臨走前叫左娣婦半夜要入院一定要打比我。