食‧咳‧嘔‧痾@瑪嘉烈 (20-9-2008)

今日原本係我與阿嫂去醫院，但我病左就由肥仔直踩到今晚9點，
但肥仔十點幾回家梳洗一番，順便拎臭屎被回家洗，一陣拎回去醫院。

今朝我叫阿嫂與醫生講〝阿B食物落唔到格，每次食藥就嘔返晒之前D食物出來〞，
阿嫂話阿B好精神，成日企起身，又講野。

之後都有傾左幾個電話，醫生話盡量都唔會比藥阿B食，佢晏D可以唔駛吊鹽水，
但粒豆就唔會拆，條腸都靚左好多。傾傾下阿B要食奶，所以掛線。

我11點幾收到阿嫂SMS，阿B剛拆走左吊鹽水條喉，藥又停，仲食左4安奶，
情況好好，聽到真係開心。

晏晝再打比阿嫂問阿B情況如何，阿B自晏晝就唔多肯食野，
但就冇嘔，又肯落地行。

夜晚9點後由娣婦睇住阿B，剛與娣婦聯絡，阿B而家流緊鼻水，而且係黃色，
又有眼屎、咳有痰，食左少少阿嫲煮既飯，精神都唔錯。

頭先阿嫂來電send左mail比我，係阿B今日既相，
真係唔該晒阿嫂，我仲以為今日會冇相添！

當然與阿嫂傾下阿B喇！咪話阿B晏晝開始唔食奶和粥既！夜晚肯食飯，
原來佢地問阿B食唔食飯，佢〝嗯〞，咁佢地就叫阿媽煮飯比阿B食，
娣婦8點就拎左飯到醫院，跟住係外面等到咁上下就入去，
阿B食左一碗仔飯，可能太耐冇食飯，掛住住家飯。

阿嫂去到阿B就企係床欄到。

又係到扮model擺pose。

玩緊〝麵包超人〞盒仔，係阿嫂尋日買比阿B既玩具來的。

拆左鹽水喉，阿嫂就帶阿B去窗口睇車。

緊係又睇緊Pingu喇！