的起心肝打電話

尋晚〝家好月圓〞大結局，今晚開始又有好節目~〝蘇 Good〞睇！

今日我的起心肝，完成應該做而未做既野。之前Samsung〝情侶電話〞壞左，而新買既Acer Notebook個內置card reader又有問題〝非我莫屬〞，一直都未打電話去〝客戶服務部〞問。

最近又想係〝7-11〞換〝億世通~迴轉式搗碎器〞2個for我&阿婆，但換唔到，前日上網睇好多人都話好用，令我更加想擁有，而老公個鬚刨又壞左，〝億世通〞又有鬚刨賣，尋晚我問老公要唔要？老公話是但，因為佢都冇時間去買。

今朝我開始逐一打電話去辦，我3條Hotline輪流不停打，又不停冇人聽。第一條打通既係〝億世通〞，我想要既〝迴轉式搗碎器〞和鬚刨都有貨。掛線後再去
〝億世通〞網睇，原來仲有一款鬚刨係防水，我就再打去問有冇貨，等老公回來睇下佢想要邊款。

客戶服務員話呢款係舊款，頭先我問果款係新款，但新既唔防水啵！客戶服務員話兩款都防水，跟住又hold左條線去check清楚。真係得舊的會防水，佢又比左意見我，我亦都問左佢邊隻好？佢用左自己既男性角度和話新的平D，而且兩款都有貨。雖然，唔係貴野，老公都預左係用1、2年貨仔，用得好可能壽命會長D呢！之前用有牌子野，壽命都唔見得好長啫！所以用平野就算。頭先問左老公都係要新款既鬚刨。

之後再努力打去〝Samsung〞和〝Acer〞，我問晒佢地維修部地址，Samsung九龍和香港都有維修部，但Acer維修部得香港區，希望可以即整即取喇！要留待老公星期六陪我去整，但唔知佢幾時先得閒呢？

晏晝睇〝都市閒情〞，今日專題係兒童風濕，原來日日飲汽水和飲凍野會有風濕架！好在我而家食飯通常都係飲〝熱可華田〞啫！但間中都有凍野既！仲有一樣就係，頭先提到一個個案，有個家庭主婦2年來做完家務好熱，立即去沖凍水涼，而家有風濕，對腳仲紅紅腫腫添！所以大家係好熱既情況下就唔好去沖凍水涼，唔係就會有風濕架喇！

今晚老公想食粥，通常都會加碟炒米粉，但我排病左呢隻菌傳染性高，煮左又唔可以試味，唯有食粥加罐頭喇！我連麵包和蛋糕都唔敢整，都唔知幾時可以整。

老公話7點放工，我就係6點半煲粥，等老公一返到來就食得。我7點半收到老公電話話放工，老公話去〝包點先生〞買個包。老公買完包又去幫我買豆腐花，粥一早煲好，而家天氣咁熱都唔駛再煲，等到老公回來溫度剛好吃得。