我也要作戰@諾沃克病毒

今日成日都好攰，行幾步就好攰，週身痛和肌肉酸軟，輕輕一碰肌肉都痛，又有發燒，又冇胃口食野。我剛睇左醫生，已証實我受阿B傳染，亦受〝諾沃克病毒〞感染，所以要等好返先去得醫院。詳細情況待身體好D先再寫。

醫生要我每次去完厠所，都要用1:49去清潔厠所、厠所地下和水嚨頭，然後要用清水沖乾淨，攪到我而家都唔多想去厠所。

我：醫生係咪關打邊爐事？
醫生：唔關打邊爐事，可能去左公共厠所後洗手洗得唔乾淨。
我：阿B都冇去厠所，咁係咪我傳染比佢？
醫生：唔係，係佢傳染你，因為只會潛伏24-48小時，佢病發先，所以係佢傳染你。

醫生又話好羨慕我，唔駛做家務，老公做晒！又唔駛返工，佢話我好幸福，點解佢乜都要做？我話你叻丫嘛！以前家務係我做，老公間中都有做家務。不過，湊左阿B和寫Blog後時間少左，做少左咋嘛！

點解無啦啦講D咁既野？因為我問醫生用1：49清潔後要唔要用水沖番？佢話我唔好咁懶喇！緊係要。我話我唔係懶，因為平時唔係我呢D野唔係我做，所以就有以上番說話勒！

尋日我由醫院回到家已成個人散晒，舉高手換衫都冇力又痛，週身骨又痛，兩對小腿成日想抽筋。老公睇到〝7-11〞有迷你電炸鍋換，我諗好早D起身，去換炸鍋，再係8點半前去到醫院。

今朝我就提早起身，一起身就感覺到不適。我個肚餓，嘴唇又乾到爆咁滯，但又唔想飲水，又想嘔，老公叫我唔好去，唔去又點得，邊個睇阿B。出門口前肚痛，攪掂打比阿媽出左門口，所以我就再訓多陣先出去，因為9點前只可以有一個人。

我拖住冇靈魂既驅殼去〝7-11〞換野，原來呢間冇，再行遠少少果間先有，去到又話換晒！吓~尋晚先出咋喎！咁快換晒，但店員話出左2星期，已返左幾次貨，可能有其他舖仲有貨。我唔舒服來到冇得換人就罄，我打比老公話佢知順便發洩一下。

我行去買早餐，再搭車去醫院，去醫院前我要搵返個靈魂先，我唔可以比人知道我唔舒服，因為我唔會係人面前做弱者，就算好唔舒服都唔會掛於面上，因沒有這必要，除非真係頂唔住喇！所以我唔舒服、成日週身骨痛，D人都唔我係好痛，因我一切如常。

我拎左舊既MP4機比阿B睇Pingu，但佢不停睇都用左1/3電，我與阿媽都擔心唔夠用，阿媽叫我回去charge電，起初我都唔肯，後來諗下charge都要2、3個鐘，我返去訓下可能會好D，我等阿B十一點幾訓就回去，問埋阿媽lunch食乜，我一陣買回來，阿媽冇選擇下食〝麥麥〞。

我離開醫院又拖住冇靈魂既驅殼回去，返到去立即charge，然後訓覺，一點幾老公來電拎電話時小腿差D抽筋，聽完再訓，2點幾阿媽來電，今次拎電話時大脾後面抽筋，阿媽問〝我幾時回去？阿B剛痾左好多臭。〞，我就回來喇！

我感覺到我自己發燒，我抖左一陣去量體溫~〝101.3度〞，老公叫我沖個涼先。我洗白白後抖左幾分鐘，再量〝100.9度〞，老公叫我去睇左醫生先，我唔去喇！我通知所有人，我知不該去醫院，但我要買lunch比阿媽，又要拎部MP4機比阿B，順便拎埋個MP4 charge機，以防萬一我明天去唔到係地都可以charge電，到時會遠離阿B和戴口罩，我只會從旁協助。

我買〝麥麥〞係病房大堂食完先入去，不過，包又食唔晒，薯條食左幾條，汽水飲左幾啖，因為我都唔肚餓~真係好少可，我留返包薯條比阿媽，其他都棄掉了。我入去換阿媽去食野。

今晚老公煮烏冬我吃，係第一次煮烏冬，用5隻手指可以數出煮過幾多次比我吃，所以呢碗烏冬係好珍貴。其實，我晚餐想食粥，不過，老公話煮烏冬。