乘機聚下

肥仔和娣婦星期四去左台灣自由行，我見阿B今日不用返〝協康會〞，所以就約左同屋住帶阿B去佢家玩。

今朝十點幾回娘家湊阿B回家，然後與老公一齊去食早餐，跟住就坐車去沙田，我去左新城市商務睇書，再去左睇下電器，然後就向同屋住家進發。

我地去到佢地食緊晏，頭先行街阿B已眼瞓，去到玩左一陣就要佢瞓，所以小朋友都要瞓。老公就落街買茶餐，呢個茶餐就係我地既lunch。阿B瞓左2個鐘，瞓醒再玩過，其實，今次我與老公既用意係想阿B與小朋友玩多D，但佢貫徹一貫作風，都係自己玩。

夜晚去左大排檔開餐，嘩~好鬼多人丫！所以有都好遲先得吃。我地order左5個餸，我都唔知阿B可以吃乜，就問有冇玉子豆腐？阿B好鍾意食，於是就order左〝琵琶玉子豆腐〞，得呢味啱小朋友，但就珊珊來遲，我吃完飯都未有，催左好多次先有得食。

今日阿B好叻，朝早食左半碗通粉，夜晚食左約半碗飯，加埋餸都有約一碗架！

豉椒炒蜆：肉質都OK，但味道略為鹹D，order時已叫左少鹹。

釀尖椒：我一向都唔嗜椒類，所以唔知掂唔掂，但佢地話OK。老公話唔似釀魚肉，覺得似墨魚，咁我話可能係魚肉加墨魚，頭頭尾尾攪埋咁囉！

椒絲通菜：賣相好得，味道都得。

牛仔骨：我好鍾意食架！味道好得，但係份量少D，每人都係一舊多D。

琵琶玉子豆腐：好味，我諗玉子豆腐可能係油泡或炸，平時我係屋企煎唔到呢個效果，除牛仔骨呢碟係最好味。