照明用具@深水埗

老公一向都有帶備電筒係身以防萬一，長度尤如掌心般，係佢以前玩War Game用開，佢想將支電筒由黃謄換LED白膽，所以出深水埗一趟，今日一出先知原來支電筒係〝美國警用電筒〞。我去深水埗都有目的架，就係搵下支〝Blog友~蠍〞既〝電子溫度計〞，仲影埋張相。

今日我和老公與高達叔叔約好1點係深水埗等，我地坐車去到荔枝角時，高達叔叔來電港鐵有人墜軌，所以封左3個站，佢就置身其中一個站，幸好未入閘，佢唯有坐小巴轉港鐵來，我和老公就行住等佢。

落車經過買袋既舖頭，舖外放左兩車婆仔銀包，而家每逢見到我都會走去搵下，因為近幾次灣仔果檔去親都冇開。

次次都失望，今次黃天不付有心人，買左2個明天可以比阿婆。原來我去灣仔果間都係佢地批出去的，全部係佢地出品，仲話遲D佢地唔做，所以唔會再有得買。

我地行完黃金高達叔叔就到，跟住一齊去食飯，食完老公又去返黃金買game，平時佢唔買架，因為佢一向認為買左一定玩唔到，但我話你唔試過又點知啫！

我地再向目標進發去鴨寮街，我行第2間舖已買到〝電子溫度計〞，行完一邊再行另一邊。呢到有好多電筒，我都買左一支，又平又光既。

行左好多間，原來老公支電筒係不可以換LED白膽，有少許失望。老公見下星期去BBQ，所以就買隻飛碟來照明。

高達叔叔話西九龍有個〝扭蛋城〞，佔地三千幾尺，但去到都唔覺咁大。

入門口就見到高達模型，裡面都有好多扭蛋機，但冇想像中咁多人。

頭先見到有小朋友用隻扭蛋係中間部機上打機，要用左邊的扭蛋先可以，雖然高達叔叔唔打機，但都扭左2隻，2隻都唔靚。

我地坐車回家歇息一下，再去落街食飯，大家都冇idea就揀左〝大家樂〞，3個人決定好食〝咖哩坑腩〞，我就入去搵位。老公出去拎左〝厚切焗豬〞和〝咖哩坑腩〞，因為佢費事大家食同一樣野，到時唔好食就弊，我知佢想食〝咖哩坑腩〞，我就讓左比佢，而高達叔叔食〝菜膽雞〞，最終都係得一個食〝咖哩坑腩〞。

老公話頭先隔離檯坐左對父子，令佢諗起當年小學寄宿既事，每次放完假回寄宿學校前，老爺都會帶佢去〝麥麥〞食一餐，我和高達叔叔都好衰講左句〝食飽D，上路喇！〞。食完飯行一陣，就回家睇〝獎門人〞。