我都算是老實人

前排天氣唔錯，咁就計劃好星期日BBQ，而且仲約好晒朋友添！BBQ我最愛燒雞全翼，但醃好既而家好難搵，所以我諗住自己醃，順手醃埋其他野食，可惜呢兩日落雨，攪到我有D唔開心。

老公叫我唔好醃，怕醃左去唔到就弊，但若果去到咁點丫？BBQ我想食雞全翼啵！老公叫我only醃雞全翼，真係去唔到就自己煮左佢來吃。明天我要去朋友家聚會，所以送左阿B返學就去買來醃。

我入到〝佳寶〞，就向目標進發，揀左20隻雞全翼，再睇下其他野，然後就走嘞！去到電梯口等電梯時，突然問自己買雞全翼係咪未比錢丫？諗下又真係冇付款就行左出來，我直頭係冇去收銀處〝嘟〞，我仲要係施施然咁行，點解都冇人截我既呢？弊！無心高買左添！

我折返〝佳寶〞，剛有個職員出來倒垃圾，我就告知職員頭先忘記比錢，佢冇出聲指住入面示意我去收銀處付款，但佢既態度表現出〝無所謂〞既姿態。

其實，之前我都試過又係同一間舖，我又係返轉頭付款，但果次就唔係我出錯，而係收銀出錯，有興趣請到〝鼻水失控〞睇下。

我不是聖人，亦都有做錯事，或者有時會自私D，但我都算係老實人丫！

明天去朋友家聚，緊係唔少得有伴手禮喇！因為明天會有小朋友，所以尋日我專登整左〝玉米片餅乾〞，我諗小朋友會鍾意食，另外仲整左〝榛果曲奇〞，大人小朋友都啱架！

尋日整〝玉米片餅乾〞有蛋白剩，所以又整左〝法式杏仁甜餅〞，前日又開左盒鮮奶，我就整多兩個〝輕盈莎莉蛋糕〞，其中一條我拎左返娘家，娣婦仲話好好食添！