被老公稱讚

今日我約左早上11點去做Facial，係上次〝Facial‧電髮@飲宴準備〞時買左個course，一直未去過，再唔去老公和朋友都會鬧我，比左錢又唔去嘥錢。

我去到以為係上次幫我做Facial的人，但原來唔係，原來上次太多客，幫我做果個人係〝姑娘〞，而唔係治療師，今次就係治療師，其實我又覺得冇所謂做得好咪得囉！

治療師邊做邊推介和介紹產品比我，雖則係冇正面sale我，但覺得佢係有舖排，所以我都係用〝哦、嗯〞來應對。佢sale我〝道入〞，咁啱上次姑娘送左一次比我，所以佢順便幫我做埋。

這個〝道入〞係用〝日本鹿兒島黑豚胎素〞，仲包埋按肩頸，所以我11點上到去，要1點15分先走得，本來係一個鐘變左做兩個幾鐘。我做完又要入另一間房與另一個人傾野，佢sale我做〝道入〞，又係要幾千蚊，老公之前已經叫我上去唔好再買野，而且又就搬，所以今次我成功推掉。走既時候又係拎埋對拖鞋走，因為我唔要佢地就會棄掉，我拎走都好放係家中等客人用都好丫，我落到樓下就打比老公。

老公：有冇sale你？
我：有丫，但我推左。
老公：叻~咁D錢可以買雪櫃。

老公居然主動讚我，平時要我開口叫佢讚先會讚，我聽到都好開心，然後就搭港鐵去旺角。之前〝PCCW〞又有優惠，若果再簽contract就送禮品，娘家電話都用左三十幾年，家人都痛諗過轉另一間，所以再簽係冇問題。今次就揀左〝特福~6件不秀鋼廚具套裝〞。

我去到排隊換領，望下工作人員身後貨物，見到有件都頗為大件，心好想唔係，但事實歸事實。拎上手都有D重，而且又長身，加上又落雨，所以我連傘都冇開，冒著雨去搭車，唔好彩我目送巴士離開。

我再等多十分鐘另一班車到，我坐係車尾，就將件野放左係窗邊位，有點唔好意思我一個人霸左兩個位，好在時間尚早車尾得我一個。過多幾個站有個阿婆上車，佢坐左係我隔離，即係車尾中間位，係一個好危險既地方，車一急停佢隨時會碌出去。我就坐左對面倒頭車位，然後讓阿婆坐入去，幾經唇舌阿婆先肯入座。

我見有D餓，所以就去左〝麥麥〞買野食，而家食得咁heavy，今晚約左朋友食飯，就唔可以食咁多。

我返到去磅過箱野有15.2磅，話就有6件，但有3件都係玻璃蓋：24厘米(7.4L)高身湯煲連玻璃蓋、20厘米(3L)單柄煲連玻璃蓋、28厘米長柄鑊連玻璃蓋。