日到夜的BBQ@赤柱

今日正義叔叔放假，而且佢舉家搬左入赤柱宿舍我地都未去過，就相約我地去佢家〝巴比橋〞，順便為今個月生日的開心果姐姐和熊貓姐姐預祝生日。

我、老公、高達叔叔和熊貓姐姐約左十點係金鐘大家樂食早餐，其他人就各自入去，今日大連小都有十幾人架！但都未齊人。出門口冇耐就開始落雨，仲越落越大添！心諗唔係嘛！我好想燒野食啵！好在過到香港區就冇雨。

正義叔叔話會叫工人醃食物，但熊貓姐姐怕工人醃雞翼冇我咁好食，所以邀請我負責醃雞翼。今次我醃左2款全翼和一款中翼，正義叔叔都醃左金沙骨、咖哩豬扒、牛扒，仲有其他，豬扒和牛扒都係用新鮮的。

蔬菜又點少得呢，仲有大眼雞。

原本係正義叔叔家燒，但係話尋晚大風吹到好多垃圾到來，所以改左係赤柱正灘燒，我都好耐冇去喇！去過都知果到得幾個爐，仲要係冇檯，所以我地將D野食擺係石上，袋就放係地下。

除左我有生日禮物送比開心果姐姐和熊貓姐姐之外，CoolMan叔叔個細囡都整左張生日卡送比佢地，生日卡內又晝左公仔，仲用左D泥膠做裝飾，真係好有心思架！

正義叔叔和兩個囡出左去捉〝寄屋蟹〞，回來幫佢地影相，係要用來交功課的。

我地有太多野食，而且正義叔叔老婆放4點，放工後會來join我地一齊燒，買左3包炭，但炭好乾身，就快燒晒，而飲品都好似唔夠，所以我、老公和熊貓姐姐就行出去惠康入貨。

我入完貨回來，就與高達叔叔、高佬叔叔和他的女朋友一齊去赤柱大街果邊影相，影完回去再燒過。

今次由天光燒到天黑，我地由下午1點幾燒到夜晚8點幾，雖然野食未燒晒，但因天黑都要停止，大家執拾好就向正義叔叔家進發，但開心果姐姐因有事做，所以燒完野食就走了。

正義叔叔叫工人煲粥，但她不太識煲，我地回來Mum叫她熄制先熄差點變飯。正義叔叔兩公婆都係好健康，所以佢地一向都係加紅米煮飯。大家坐下、傾下計又食下粥，大約9點半就散。