赤柱‧香港食@拍拖十週年紀念日

今日係我與老公〝拍拖十週年紀念日〞，我要求去〝赤柱〞，〝赤柱〞係我其中一個鍾意既地方，亦係以前我間中會去既地方，我想緬懷一下之餘，又想去〝Jenny Bakery〞買曲奇，所以老公大人免為其難陪我去。

我地原本只係去〝赤柱〞一個地方，去去下就去左好多地方食野，當然係去香港區搵食喇！難得過香港嘛！但搵食有D失望，冇介紹講得咁好。

今日老公食到咀篾篾，又成日話〝呢D粗製濫造〞、〝名大過實〞，佢返到屋企突然係到發嗡瘋~今日大為失望，食餐野都趕頭趕命，強差人異、名不符實，佢一次過講左好多多到我唔記得左。

今晚有個奇遇，老公有個朋友(小學同學)，佢轉左揸電車成年，估唔到今晚會見到佢揸電車。我地由灣仔行去金鐘搭車，有架電車往灣仔方向駛過，老公突然話〝電車先生〞，我見佢架車埋站，所以我地轉頭奔跑過去，與他傾談左幾句。老公話當時佢地大家互指，即刻大家都發現到大家。返到屋企老公都有打比〝電車先生〞傾計。

今日12點老公起身，我諗住都係樓下食埋野先過香港，居然老公話過〝中環〞食，我就即刻諗起〝蘭芳園〞，這裡就係我地搵食第一站。

蘭芳園

我地去到已見到有好多人係到影相，大多都係遊客，仲有見到傳聞中綠色長木櫈，但有好多人坐住影唔肯走。〝蘭芳園〞鐵皮屋街舖後，有個舖位，聽講話係〝舊舖〞，再行落幾個舖位又有一間〝蘭芳園〞，我相信呢間叫〝新舖〞，我就係係〝新舖〞外面等食。

老公見到有好多人等，佢想去另一到吃，我覺都唔係好多啫得4-5個人，同埋呢到又唔會坐好耐，D人好快走，講完唔夠5分鐘就入得，當然係要搭檯喇！食完大家都覺得一般冇乜特別，可能係我地兩公婆唔識欣賞，又或者好似老公咁講〝呢D粗製濫造下既產品〞，呢餐盛惠68大元。

豬扒包：豬扒好腍，唔會好似出面咁乾。

傳統咖央多士：咖央唔夠甜，我落左糖漿，同檯對情侶都唔夠甜，一樣落糖漿食，冇乜特別。

蔥油雞扒撈丁：係等位時我睇過門口訪問，呢款野靈感來自lunch的燒味飯和公仔麵。豉油鹹左D，份量少，冇乜特別。

凍奶茶：我冇飲野，老公例牌飲〝凍奶茶〞，但我食到口渴飲左啖，飲完個口有D苦，奶茶冰得少少，其他都係水冰。老公話奶茶唔好飲，我沖的〝百爵香滑奶茶〞比它還要好，唔知佢係咪氹我呢？

石板街

食完就去〝交易廣場〞搭車去〝赤柱〞，途經〝石板街〞影下相，影完想行轉身唔見左老公，再望上D原來有人問路，等我走過去睇下先。

我聽到果個人講英文，旁邊企左個化左濃妝女人，應該係佢老婆，佢地兩個都係亞洲人應該over60歲。佢講單字英文，要去〝中環廣場〞，但講講下原來佢係想去〝山頂纜車站〞，呢到行去好遠，全程我用我緊餘既英文同佢溝通，真係好耐冇講過差D連緊有都冇埋。石板街有個咁既標誌，唔知係咩意思呢？

赤柱

我地到〝交易廣場〞冇搭〝6號〞巴士，因為老公話它行山路要兜好耐，我地揀下一班〝6X〞。

赤柱改變左好多，人亦比以前多，我比較喜歡以前既寧靜，係舖仔檔內我發現到呢間〝Exclusive〞，裡面有好多高科技既野，與其他舖格格不入，但舖內又有好多人，而且仲有人買野，D野都唔平架！

我見到有間野叫〝Bay Side〞，就同老公講〝痺晒，你隻腳痺唔痺丫？〞，老公望住我笑。

有兩間廟，一間座落於個高檯上，面對住大海，而另一間就係係地面，出面仲開左檔〝書報攤〞，旁邊仲有間茶餐廳添！

廣場附近有個小丑係到表演，仲見到有個外籍小朋友企定定係到睇，小丑身後果兩個應該係佢父母親大人，到我行完走都仲見到個小朋友係到睇。

行前D就有個〝香港海事博物館〞，我地冇入去，等我下次拎過部相機先入。

〝香港海事博物館〞旁邊有好多呢D石柱。

〝赤柱卜公碼頭〞老公話係〝卜公碼頭〞拆，然後搬過來的。

我地行到廣場都唔見〝Jenny Barkery〞，就再由頭行多次，但都係唔見，我上網睇過地址，去到都唔係果間。

頭先行過舖仔見到有好多香薰，我對此冇興趣，而且老公有鼻敏感唔聞得，不過，就好靚，所以我就揀返件先，可以有樣野可以紀念下今日特別日子嘛！跟手我問下老闆知唔知係邊，老闆話係〝赤柱〞商場2樓。

赤柱~Jenny Barkery (http://www.jennybakery.com/)

頭先見到遊客都拎住，冇理由我會搵唔到架！得到指點後搵到喇！其實，商場我都經過2次都冇抬頭望，我地由商場後門走，商場後門一入就係〝Jenny Barkery〞。

我買左〝4Mix (2)〞，見好多網友話好食，老公又鍾意，所以想試下。我見個罐底有〝咖啡精〞，弊喇~老公一有咖啡成份就會嘔。

頭先老公要求開封，一開就有好大陣咖啡味，我試左一口本身冇咖啡味，但與咖啡味放在一起，所以有少少，我給老公吃，佢一吃就嘔。之後老公每吃一塊，都係由我試食左先，好似以前皇帝咁，奴才試食完先到皇帝。

老公話冇乜特別，我就覺得好鬆化，感覺好似大力D都會散，我覺得OK。

大利清湯腩

老公話晚餐去西灣河食車仔麵，但食過，我想試新野，於是就去去阿蘇介紹既〝大利清湯腩〞吃，我地搭返〝6X〞走，係律敦治落車，但老公沿途都話我地上左賊車，因為我地搭〝6X〞貴過〝6號〞，但〝6X〞行左山路，落車後望真D個牌真係〝6X〞，咁即係個司機行錯路，我搭咁多次巴士真係第一次行錯路。

我地行左好大個圈先到〝大利清湯腩〞，食過後都係不外如事啫！呢餐盛惠〝73蚊〞，老公食左一啖就話〝名大過實〞。

我試〝咖哩牛腩米〞，味道一般；老公食〝魚蛋牛腩麵〞，魚蛋好彈，但好腥可能唔新鮮，另外加多個〝腩汁蘿蔔〞，又係冇特別，係蘿蔔多水。我懷疑係咪去錯呢，舖內人不多，位任你揀，門面又冇阿蘇個樣，但望下張單地址冇錯啵！我見老公個樣唔多高興。

我地決定由灣仔行去金鐘搭車，老公話前面有〝泰昌蛋撻〞，佢好鍾意食蛋撻！所以我就從容佢吃，而家〝懷舊貨迎新歲$3.8〞promotion由(31/12-4/1)。我見到沙翁想食，但太多糖，都係食蛋撻算。老公話蛋撻比以前甜，冇以前咁好食，我套用佢果句〝呢D粗製濫造〞。

我影緊〝和昌押〞時，老公呢到就係改建左做餐廳架喇！哦~原來係呢到。