年初二‧年初三露營@西貢灣仔2009 Day 2

欲知前提如何請到：年初二‧年初三露營@西貢灣仔2009 Day 1

28 January 2009

尋日聽完AL弟弟和泰利咁講，大家都怕會凍C，A小姐帶左暖貼，夜晚我與老公每人都貼左一塊，但就冇著住外套瞓，可能人多夜晚瞓覺時都唔覺凍，有D熱到拉開左睡袋瞓。

今朝3點已想去〝殊殊〞，瞓下醒下捱到7點幾拍醒老公陪我去，又再瞓下醒下等到8點幾契大佬起身，我又跟住起身，之後其他人都陸陸續續起身，只係得老公一人仍在睡夢中。我地燒蒜蓉包，又燒尋日BBQ和打邊爐的剩餘物資。

我見AL弟弟和契大佬開始炒蛋，我就去叫老公起身，個個都食完，等到你起身又煮過比你食咩，佢居然話唔食，我唔理限佢十分鐘內要出營。

除左奄列，仲有太陽蛋，還有煎餃子，餃子係尋晚打邊爐剩既。

AL弟弟煲蠔豉瑤柱粥。

契大佬炒完第一轉米粉，A小姐見有盎沙嗲醬，就order一個沙嗲炒米，味道唔錯。

我行開左回來就見到呢隻狗，佢地仲幫佢改左個名叫〝阿璜〞，AL弟弟比左舊包佢吃之後又停在此處，阿璜係AL弟弟身後守候，我地又再比左幾舊包佢吃，連食唔晒既米粉都請埋佢吃，因為阿璜係流浪狗，所以乜都比佢吃，又被水佢飲，但我地都有節制既，怕佢一次食咁多，幫佢變左害佢。

阿璜食完有時都坐得好是正架！

契大佬帶左彩虹風箏，丁丁小姐帶左Batman風箏，所以我有機會跑下，放下風箏，我仲嘗到人生第一次自己放得起隻風箏，自己拎住隻風箏和線轆，一路跑一路笑感覺自己有D似傻婆。

野食好似食極都唔完，所以臨走前來個一品煲，將唔帶得走既都一鑊熟，可以帶走既物資，就各自認頭。

食飽就執行裝和收營，頭先都有D人來影我地個新營，前面得層紗就係尋晚男仕瞓既地方。

新營太重，要用手拉車先可以攜帶。

之前朋友們認識左一對營友夫婦，佢地常常來，而且設備好完善添！朋友們都係見佢地個營幾好，就由台灣訂一個回來，果個營就係呢個新營喇！

頭先營友夫婦由南營地上來行，與我地傾談左一陣，我地走既時候又去探下佢地。佢地有將吹氣床，有床就緊係唔用睡袋喇！佢地帶埋平時用既羽絨被來，又有檯仔、暖爐，佢仲話開左個暖爐來發麵包添！真係令我羨慕。

隔離個營就係佢地個飯廳，帶備埋檯布，又有花，又有的私家櫈，幾浪漫。