阿嫂陪我Shopping

今日老公要返工，肥仔公司Annual Dinner可攜眷出席，所以我已通知肥阿哥今日會帶阿B過去佢家中玩，阿B三點要去〝協康會〞上堂，然後肥仔佢地會直接湊阿B去肥阿哥家。

前日熊貓姐姐先陪過我行街，買左條又抵又鍾意既牛裙，但仍未消除到我既購物慾，所以自己再行下街先。我一個人行唔到咁耐，所以問阿嫂一陣會唔會出街，唔出我行完就直接去佢到。阿嫂都諗住外出食野和行一陣，咁啱喇！但我剛吃左個米粉，我就行住等阿嫂，阿嫂食完野就call我。

我行左好多地方，已搵到心中既目標，等埋阿嫂既意見，就可以有決定嘞！我約左阿嫂係〝Giordano〞等，因為我既目標就係〝Giordano〞，阿嫂都話好我就買左，仲想買件襯衫，襯衫一百蚊一件，阿嫂見買3衫就190蚊，佢就買一件，而我就買左2件，但有件冇貨要遲D先有得拎，圍起唔駛一百蚊件，咁樣平D。

肥仔來電阿B未醒，所以唔返〝協康會〞，所以一陣我地行完街要回娘家湊阿B。我仲想買件外套，阿嫂好細心幫我搵，我地逐間行、逐間睇，但好多都唔乎合我要求，有D我肥得滯著起比較窄，最後都後冇買外套。

我地行下我又買多件衫和襯衫，件衫我擔心窄，但店員話啱，唔啱都有得換，若果我來這裡先，就可以慳返唔買〝Giordano〞既襯衫，因為呢件襯衫不論質地或款式比起〝Giordano〞還要好。

我地行到4點幾，就去〝Taste〞買晚餐材料，晚餐我煮〝肉醬意粉〞，又覺有D肚餓，所以就買D野食回去。我地回娘家接阿B過去，坐左一陣我就試衫，件衫唔駛換，阿嫂仲話我著左唔覺肥添！

肥阿哥放工回來，佢話今晚月亮會好大，因為最近地球，跟住唔知幾多點佢就拎埋腳架上左去天台影相。

今日我買既衫都好滿意，係相比〝Giordano〞件襯衫唔多抵，食完飯玩一陣就送阿B回娘家。我要行路回家，老公好攰就要搭車，我叫佢自己搭車回去，我行路，佢唔出聲一直陪我行，在寒風下邊行邊傾計。

我：今日買既衫係咪可以claim返錢架？
老公：咁我今日咪白做。(笑笑口講)
我：咩丫！我好耐冇買野喇喎！你又有買巴士啵！

佢唔出聲淨係係到笑，以前我成日買野，而家節制左好多。我又想吃薯片，老公又陪我去買。晏晝係商場見到有兩個人係台上被人影相，其中一個係〝Lisa S〞。

仲有呢個唔記得咩名，有好多人圍觀既人都係到影佢地，有D仲有準備，有長鏡，又帶備櫈仔和梯。我記得高達叔叔講，有好多人都係咁，佢地知道邊到有靚女或展覽，就會帶備行裝去影架喇！今日我見都係小兒科，之前見過有D仲誇。

阿嫂同事話佢知呢到有〝孖實磁石扭蛋〞，佢想要子彈，阿嫂好彩地一扭就中左心頭好，拆開隻蛋，搖粒子彈有聲，我地以為爛左，問個店員，店員一聲不響拎左子彈〝禮〞手就磁左上個箱上。