蝦子餅曲奇 (內附食譜)

首先要講唔好意思先，因為大家睇到〝蝦子餅曲奇〞，可能都以為用蝦整曲奇咁得意，但其實係冇既，我改呢個名原因係這曲奇為老公而設的，我諗不用多解釋大家都知〝蝦子餅〞係點解。

老公平時都好忙，但近日更加忙，忙到星期六都要返工，仲話下星期最早都要9點先放工，而且之前公司又發生左D事，所以我就整佢最鍾意既曲奇慰勞下佢。

我整既曲奇佢次次都話唔夠甜，我就參考左好多個食譜，而且麵粉開封左好耐，慕求用晒佢，就自己研製出這款曲奇。我又記得用〝固體菜油〞整野都會脆，就加埋〝固體菜油〞喇！但好擔心唔知好唔好食，我吃緊減肥餐，要等老公回來試食。

老公入門口鞋都未除，我就立即送上曲奇，佢一口食晒，我不停問佢點丫？鬆唔鬆？脆唔脆？老公話又鬆又脆，但佢話有D苦，冇理由會苦既，我立即拎水比佢嗽口，再送上曲奇，要佢食半塊先，再食埋另外半塊，呢塊佢話唔苦~好食。

食後感：

老公：好食。
阿婆：好食，鬆、脆。
阿媽：最好食，鬆、脆。
阿公：試食左一塊，問曲奇係邊？又拎多塊，問佢夠唔夠？佢又再要多幾塊。
阿B：食完一塊又一塊，見人食又要分人一半。

曲奇未焗之前都有造型，焗完就走晒樣，我已經好用心去唧，慢慢唧，我諗都係要唧咀既問題，遲D買過個新先。

蝦子餅曲奇

材料：

無鹽牛油        70克

固體菜油        70克

麵粉                175克

糖霜                95克

蛋                    1隻

做法：

1.          先以180度預熱焗爐。

2.          牛油、固體菜油，用電動打蛋器打成為絨毛狀。

3.          糖霜分3-4次加，每次加入就以含入空氣的方式攪拌混合。

4.          蛋打散後分1-2次加入攪拌均勻。

5.          加1/3量的麵粉，迅速混合到看不到白粉為止。

6.          加剩餘的粉，改用橡皮刮刀，一手邊將容器各面前旋轉，而以縱向切入般混合到看不到白粉。

7.          入爐墊放好在焗盤上，將麵糊倒入唧花袋，整齊地唧在焗盤上。

8.          在焗盤上唧出形狀後，再放入焗爐以180度焗約15-17分鐘便成。