年初二‧年初三露營@西貢灣仔2009 Day 1

27 January 2009

今日大年初二，我與老公和朋友們一齊去〝西貢~灣仔〞露營，只係去兩日一夜啫！不過，尋日AL弟弟、大眼哥哥、丁丁小姐和泰利，已入左去霸位，我地約左11點係百佳等，而且要飽肚去。

我8點幾起身梳洗，然後去煮個米粉吃，老公就瞓到差唔多出門口先起身。我就係門口看守背囊，其他人就入去買野，等等下A小姐到，有人陪下我傾計。

老公未吃早餐，我見佢食我又想吃，所以就買左每人一件雞批和蝴蝶餅，老公話我整既蝴蝶餅比它好吃，佢食左一半都冇就唔食，我又覺得冇乜野，成件食晒。

尋日南營地冇位，所以就往上行去西營地，兩個營地都比想像中少人。大家都鍾意南營地，因為個厠所比較近和方便，而且北營地又冇厠所水，真係好鬼麻煩。

今次人多，就用左個新營，呢個營可以容納十個人瞓架！我地有11個人，所以大眼哥哥拎多個蒙古包，係佢與丁丁小姐瞓。

新營中間可以拉埋拉練，就會有2間房架喇！而且兩邊都有門口架，但係男仔要瞓果邊就會好凍，因為得層紗。尋晚AL弟弟和泰利每人瞓一邊，話寒氣由地下浸上，AL弟弟平時身體好強壯，佢仲話半夜凍醒添！大家聽到都好驚。

我地入到去一陣，契大佬就開始煎糕吃，因為契大嫂整左年糕和芋頭糕，而我又拎左底蘿蔔糕，樣樣糕都好吃。我整既曲奇和鳳梨酥，反應都唔錯，大家都鍾意，真係開心。

AL弟弟、大眼哥哥、丁丁小姐和泰利就BBQ，BBQ就係佢地今日既lunch，我地當然又燒下咁喇！我從不吃羊，大眼哥哥話好吃，我就吃左件羊架，雖有D羶味，但好juice。其實，入去我地係預備食杯麵，但食左咁多糕和BBQ都飽晒。

我地又執柴燒，感覺好似小時候回鄉幫手燒柴咁，好得意。我覺得個火似牛，你話肉唔似呢？

今次AL弟弟釣到條〝大尾鮲〞比上次大條好多，咁就冇上次營友果條咁大。

AL弟弟宰完，加D調味料爆一爆，嘩~肉質好爽，咋一聲就冇晒喇！

我聽到有聲，老公照過去，霎下眼老公話係松鼠，之後又再聽到聲，再照過去，原來係老鼠。大家都用光照住佢，佢採取敵不動我不動，唔理佢一陣就閃走左。

今晚我地打邊爐，有清湯和麻辣湯底，麻辣湯底初時都有D辣，食食下只係得個〝鹹〞字。

食飽就飲杯紅酒先，之後就玩〝魚、蝦、蟹〞，每人輪流做庄，我與老公都贏左十蚊架！

欲知後事如何請到：年初二‧年初三露營@西貢灣仔2009 Day 2