與老爺團年飯@2009

之前我睇〝都市閒情〞話今年食團年飯最好係〝年26〞，其次就係〝年29〞，所以我就揀左今日與老爺食團年飯，娘家要就阿媽返shift，所以係〝年23〞食左。

我2點幾叫老公起身去食野，我自己緊係食左早餐喇！唔係要餓咁耐，我會死架！我地冇去商場食，老公話人多，求其係樓下茶餐廳吃。

自從商場裝修、重組後〝肯德基〞消失了，它是我其中愛吃的東西，我已很久沒吃，近排常常想吃，但要吃它就要搭車去買，所以我就係茶餐廳同老公講。

我：我一陣唔食飯，臨走要買件雞。
老公：一陣食團年飯喎！你唔食飯？
我：我齋食餸咪得囉！我想食雞丫！

老公冇理我繼續睇報紙，我地回家坐左一陣，跟住拎埋一底〝蘿蔔糕~混合版〞、半底〝馬蹄糕@2009〞和少少〝蝦子餅曲奇〞比老爺。

坐車時，老公話D〝蘿蔔糕~混合版〞好香，我都覺得，尋日蒸完都聞到陣陣香味，老公好少讚我，咁樣我都當佢讚架喇！嘩~咔~咔~

我地上去老爺家坐一陣，又擺低D野，又睇下信，又傾下計，然後先去食飯。老爺去左高達叔叔舖頭買花生，我冇諗住食，但老爺話好食，我就試下喇！見到花生衣係紫色，唔駛食就知好味喇！又鬆化，果然唔錯。

我地又係去返上次〝大排檔與老爺做冬@2008〞果到，今次坐裡面，因為凍過上次好多。Order左3個餸，仲貴過上次order5個餸，因為今日叫左半隻〝炸子雞〞，要90蚊半隻，樣樣餸都好味，水準仍然可以keep到。

我與老爺share碗飯，每人半碗，食完跟住就〝KFC〞買一件雞吃，當然take-out喇！搭小巴回家，聽到小巴司機打電話問有冇塞車，因為條線其中一段路有架私家車著火，駛到去果段路真係塞車，小巴左穿右插好快就過左，見到警車、肇事車輛、報館記者、電視台記者，肇事車輛火已救熄，仲係小巴收音機聽到呢單新聞。

返到屋企，老公就幫厠所大掃除，跟住又拖地、掃地，而我就摺衫，再等衫洗完就要曬衫。

椒鹽焗肉排~未食已聞到好香，食埋更加好味到不得了，味道剛好，又唔會太鹹，肉又唔〝鞋〞，好腍，成碟清晒。

炸子雞~半隻90蚊，order左半隻，但好味過酒樓，皮好脆，肉質又係唔〝鞋〞，但老爺話冇雞味，查實對於我來講都唔知咩係雞味。

西芹炒帶子~老公幾乎每次吃飯都要order帶子，因為佢好鍾意食，老爺就唔多好，因為佢話淡茂茂，唔知有乜好食，呢碟味道一般喇！