提早洗邋遢@廚房

尋日晏晝一心等阿B瞓晏覺，就攪下娘家個廚房為新年作準備，但佢點都唔肯瞓，我都唔理照幫個廚房洗邋遢。

之前朋友教我係廚房牆上舖保鮮紙，咁就唔駛成日抺廚房喇！我見阿婆日日都抺咁辛苦，有建及此就仿效呢個做法，但係時間唔夠我只係舖左保鮮紙，而爐頭和爐底就要今日先攪。

今日阿B好乖一陣就瞓左，我就立即開工，近爐頭和爐底唔可以用保鮮紙，我就用爐紙舖，最麻煩就係要度位，再用錫紙包埋煤氣喉，花左個幾鐘就攪掂。

我攪掂晒就推介一下〝蝦子餅曲奇〞，好評如潮，所以我晚上回家，就立即開工再整。我用double份量，因為諗住比D阿媽拎返公司食，而且明天又有聚會，又拎D比朋友仔試下。老公話今批比尋日淡，唔夠甜，點會咁既呢？我都係用同一份量啫！真係抓晒頭？

今次大量製作，我由7點半開工，整就好快，連埋焗攪到差不多12點，原本我諗住整3倍份量，所以蛋都打左3隻，而家放左隻係雪櫃，我焗爐細怕有排焗，就整2倍份量，若然真係3倍，都唔知幾點有得瞓。我唧唧下真係唧到好似玫瑰花咁，真係練得多會有進步。今日我同阿婆講下星期佢回鄉時，我就整多D比佢拎回去。

尋日專登用晒麵粉，所以頭先要立即去買過來整，正當我篩麵粉篩到尾聲時，就見到牠，我影左好耐相，後來發現佢仲識郁，可能頭先被我篩暈左，牠好似係〝穀牛〞，盒粉係新買，咁樣令我好擔心會唔會仲有，但太夜遲D先去考證。