Round 1：鄭秀文三日減肥餐單

燃燒總數：5磅                                  燒脂總數：2.9%

第一日燃燒指數：2.8磅                   燒脂指數：1%
第二日燃燒指數：1.2磅                   燒脂指數：1.7%
第三日燃燒指數：1磅                      燒脂指數：0.2%

之前講過唔再跟減肥餐去減肥，但係見上個月成績唔多好，都係怪自己為食之過，而且又懶只靠行路，冇做運動。

咁啱上星期被我見番〝鄭秀文三日減肥餐單〞，其實呢個餐我都有，以前返工好難跟，我諗住又唔駛返工，都係食3日好快攪掂，3日就可以減10磅，但有D就寫減4-6磅，而且我見有人話唔跟足都減到，仲有好多model出show前都係靠佢來減，〝鄭秀文〞又咁有效，於是我決定一試。

我有左上次既經驗，D餐單話減幾多，就預佢減得一半好喇！免得自己失望，所以我預左減到5磅，成績真係減到5磅，若然我諗住減到10磅，咁既成績一定會唔開心。我係第2和3日晏晝，都有去肥阿哥會所玩左半個鐘跑步機，因為我想減多D。

若你單吃一次呢個餐有D貴，還掂都係剩番咁多物資，基本上都唔駛再買，所以我諗住再食多幾次。尋日阿婆話我有咁多野食，但個餐對於我平時咁大食來講，有時會有餓既感覺，但又唔會好肚餓。不論我食什麼減肥餐，都會想吃餐以外既野，但平時又唔會架喎！可能呢D就係心魔嘞！但我能戰勝心魔覓自我。

我睇減肥餐時有好多食物都有疑惑，究竟係用邊隻、食邊隻呢？所以我就影低晒，等有興趣既朋友可以參考一下。

豆角 / 四季豆：我揀左〝四季豆〞，四季豆又稱玉(肉)豆、敏豆、菜豆，但大家一定要烚到好熟，因為〝四季豆〞本身含有天然毒素，內地有幾單報導都係因為食左未熟〝四季豆〞中毒入院。我初時烚冇味，之後聞到草青味，烚到一段時間就冇，我都怕中毒，所以烚左好耐，烚到佢有D黃黃地先食。

脫脂芝士：我買唔到，只係買到〝97% Fat Free〞咋！一pack約30蚊，得10塊為3蚊塊。

乳酪：我估係純原味，但我買唔到，我買左〝低脂純乳酪~甜味〞。

熱狗腸：全個餐最貴，一pack$49.9得6條，雖則係〝熱狗腸〞，但係〝辣肉味〞唔知有冇買錯，肥仔和阿媽都試過話好味，阿B仲食完再食，可想而知幾好味呢！

任何肉：唔知份量，我就去凍肉店四左pack雞柳，抽左2條用鹽、胡椒粉醃一陣，再拎去烚。

吞拿魚：要吃真係好dry、好難咽，第一日我就夾落多士到吃，而第三日仲要食一罐，我就一啖椰菜花，一啖吞拿魚，咁就好D，直到吞拿魚吃完，我就冇食椰菜花，因為我唔鍾食和難食。

鄭秀文三日減肥餐單

第1天

早餐：西柚 (半個)、花生醬 (2茶匙)、多士 (1塊)、咖啡或茶 (1杯)

午餐：水浸吞拿魚 (半罐)、多士 (1塊)、咖啡或茶 (1杯)

晚餐：任何肉 (2片)、豆角 / 四季豆 (10條)、紅提子 (10大粒)、蘋果 (1個)、雲呢拿雪糕 (1杯)、咖啡或茶 (1杯)

第二日

早餐：香蕉 (半條)、烚蛋 (1隻)、多士 (1塊)、咖啡或茶 (1杯)

午餐：乳酪 (1杯)、鹹梳打餅 (2片)、咖啡或茶 (1杯)

晚餐：熱狗腸 (2條)、西蘭花 (半個)、紅提子 (10大粒)、香蕉 (半條)、雲呢拿雪糕 (半杯)、咖啡或茶 (1杯)

第三日

早餐：蘋果 (1個)、脫脂芝士 (1片)、鹹梳打餅 (1片)、咖啡或茶 (1杯)

午餐：烚蛋 (1隻)、多士 (1塊)、咖啡或茶 (1杯)

晚餐：水浸吞拿魚 (1罐)、紅提子 (10大粒)、椰菜花 (大半個)、香蕉 (半條)、皺皮瓜 / 哈蜜瓜 (4安士)、雲呢拿雪糕 (半杯)、咖啡或茶 (1杯)

注意：

1.      每日飲五杯清水(9安士一杯)，在每餐之間及中午及臨睡前飲，除此之外便不能飲用或進食其他東西。

2.      依足次序，不可亂調或用其他替代品。

3.      生之食物只可白烚至熟，除可用食鹽及胡椒粉外，不能加其他調味料。

4.      咖啡/茶均不可加糖及奶。

5.      配方有化學作用，不可任意刪改，第一次連續三天節食可以減十磅，三天後可照正常飲食，但不可過量，經過四天的一般飲食後，如再想減肥時可以吃三天(減肥餐)，但一定要相隔四天之正常飲食才可繼續，如此一個月便可減四十磅。