第一個‧第一次@頭獎

今朝我6點幾起身，阿B九點要去〝協康會〞上堂，我行到娘家樓下收到肥仔來電，佢話姑娘剛打比佢要取消，因為病左。我聽到即刻有D唔開心，一心計劃湊阿B返完〝協康會〞，等佢瞓晏覺就回家換衫，因為我今晚要外出吃飯，若果一早通知我就著埋套衫回娘家，唔駛行來行去，但又唔怪得人既，正常都係8點幾通知，換轉係我都一樣呢個鐘數通知。

今晚晚飯係要多謝至Fit姐姐既邀請，有某酒店邀請至Fit姐姐和她的同事，而且可以邀請朋友去，所以就叫埋我、老公、熊貓姐姐、開心果姐姐、高達叔叔，仲有她的老公(至Fit老公)一起參與。

今次有個主題，到場賓客都要有〝紅色〞物品，我諗衫有D紅或Accessories紅就可以，但我係〝黑衣人〞邊有紅色，所以我就趁回家換衫前去買。上次與阿嫂行街都有留意下既，有諗過買手鐲定頸飾，所以我已有目標店舖。

我去到目標舖頭睇頸飾，呢間係印度物品，所以老闆娘都係印度人，紅色頸飾得2條，但唔多襯套衫，後來見到有幾款紅色介指，最靚都係呢隻，老闆娘都係咁講。唔好睇我隻手，因為天生粗糙，加上我又冇保養，粗上加粗，隻介指係木製，表面圖案用漆油劃，這隻我譽為〝Luck Ring〞，睇落去就知架喇！

我等熊貓姐姐放工，然後一齊搭車去，我地集合好就去酒店，至Fit姐姐與同事們已在酒店大堂等我地。上到會場外面，望入去已有好多人，酒店邀請左好多公司，酒店緊係籍今次來Promote一下。在reception留咭片抽獎，冇帶就可以填資料抽獎，公司名當然寫至Fit姐姐公司喇！仲每人派左個利是封，到左一陣至Fit老公都來到。

一早知道係冇位坐，而且係Buffet形式，起初都係影自己隻碟既食物，但燈光太暗，所以我直頭係出面影，有個〝鬼佬〞見到就問我〝係咪影低，然後返去自己照住整？〞，英文不靈光的我答〝Yes〞，我懂聽不懂說。食物比想像中好味和品種多，仲有〝片皮鴨〞食添！

台上有人介紹酒店，然後又有人表現唱歌，過左一陣見到台上有幾個紅衫人，用掌聲來代表得分，我諗要紅色就係咁用。

到抽獎時間，到尾聲時至Fit老公過來問〝點解你地唔過去睇下？佢地都去左〞，佢地即係至Fit姐姐和同事們，我立即話〝車~都唔會抽中架喇！〞，到抽大獎時熊貓姐姐聽到至Fit姐姐公司名，跟住我就聽到自己個名，從我講完句話和聽到自己個名，都好似發生於電光火石間，我最多都係抽過2獎，大獎都係第一次，得獎後又見到頭先個〝鬼佬〞，佢又恭喜我，真係好開心。

今年有個好開始，希望一直幸運落去，大獎HKD3000 Dining Coupon可以係該酒店名下地方用，我唔知係隻介指有幫助，定係晏晝我帶阿B落街，有人跌左錢我叫人執返，所以抽中呢？有樣野我知既就係〝叨至Fit姐姐公司既光〞。

我地與至Fit姐姐同事們即刻轉移陣地，臨走又每人派一份禮物。

我地去樓下餐廳食buffet，9點last refill，食到9點半，即係45分鐘食，所以大家轉去中餐部。張coupon三千蚊，但連加一埋單要三千三先可以，我地就揀左〝魚翅老虎班套餐〞，加埋酒水，每人都係補多29蚊就可以。套餐有魚，又有翅食架！我地等左好耐都未有野食，我地未出聲就聽到個部長問個傳菜‧‧‧

部長：點解咁耐都未上菜？
傳菜：廚房得一個師傅咋！

部長聽完就入左廚房，大家都話呢D套餐通常都係一早訂定，所以我諗而家個廚師好忙。今餐覺得唔係咁好吃，樣樣都沒什特別，亦唔係照餐牌次序上菜，我地每款都有吃剩，所以至Fit姐姐同事們包走，明天帶回公司一齊再吃，我都包左甜點回去比阿公和阿婆吃，就等逐樣介紹一下。

豪苑精選四小菜：餐牌一早收走左，後來睇返相，原來與餐牌不乎，不過，都幾好吃，我從不吃豬腳，至Fit姐姐話好味，而且冇骨，所以一試，骨有少少喇！但果真好味，而另一碟餚肉都好味。

碧綠美果帶子：我與老公都食到帶子未熟。

杏香百花球：上檯時仲出煙，所以唔太脆，放涼後我才吃，都唔脆，蝦唔彈牙。

紅燒竹笙雞絲翅：好稀，翅好少。

蠔皇海參扣玉掌：我好鍾意食鵝掌，但呢碟唔好吃，鵝掌又細，而大部份海參又未腍，而且食落有D怪怪地。

清蒸雙老虎班：我唔吃魚，但佢地話好味。

上湯菜膽雞：高達叔叔話隻雞好〝鞋〞，至Fit老公話隻雞冇雞味。

魚湯鮮腐竹浸時蔬：竹笙有D酸，老公話用上湯煮係咁。

金瑤蛋白菜粒炒飯：佢地話好味，但我覺得淡左D，佢地話呢個飯係咁架啵！

生磨合桃露：又係好稀，好似水咁，唔似合桃露，熊貓姐姐話似〝火麻仁〞。

椰撻‧笑口棗：頭先其中一人吃〝生磨合桃露〞，吃到片魚鱗，所以就送比我地吃。