咳〝瘦〞

今早上磅一夜間瘦左2磅有多，可能係咳得勁、夜晚瞓得唔好，而且半夜又成日咳醒，咳真係好易會令人瘦。我咳到好似肺癆咁，喉嚨又有血腥味，有時有啖，有時乾咳，而家鼻涕和啖都係綠色。

我由星期日病情開始轉壞，至今輕左4磅有多，若然上星期六(唔夠喉@羽毛球)唔係夜食野，咁就好喇！個磅數可以好睇D。

今日阿媽休息，我去左睇醫生，探過熱有燒，尋晚都覺有得罄，但冇理。醫生話通常D菌都係係喉嚨，但我而家落到氣管，所以我要食〝抗生素〞，仲要覆診，而且建議我病好要去打〝傷風、感冒〞針。

我問會否傳染？我話前呢幾日都有湊姪仔，醫生就叫我停止一切活動，不過，大人感染機會好微，因為抵抗力好，小朋友就‧‧‧。我要求醫生開隻好瞓D既藥，醫生要我食一次藥先可以離開診所。

今次咳藥水係透明，記得之前阿B都吃過呢隻藥，佢一食就嘔，當時大家都聞過話難食，我一見到就縐眉。我通知左娣婦明天唔湊阿B，星期五未知，到時再聯絡。透明藥水，入口甜，之後就苦，苦味在口內迴盪，我飲左幾啖水都沖不去苦味，真難吃。

我約左熊貓姐姐食lunch，我地去左〝小巴黎〞，兩都吃〝鮮牛肉湯米〞，我邊吃邊〝新〞鼻涕，有時又咳，真係肉酸。

食完熊貓姐姐未夠鐘，我地去左〝Bossini〞睇衫，大家都睇中同一件，就拎自己個size試，熊貓姐姐件好啱身，我件就大得滯，但著熊貓姐姐個size又細左D，最後我都係冇買，熊貓姐姐放工先去買。

我諗住去〝二德惠〞和〝橘子〞行下，上到去〝二德惠〞休息，就行樓梯落一層去〝橘子〞。我推開防煙門就諗起前日〝恐怖的夢〞，有一幕係係樓梯追逐，心怯下意識向後望，真係有個男仔跟隨，心驚到極點，拿拿淋行去〝橘子〞，原來佢又係去〝橘子〞。

我坐港鐵回家，回家前去睇下對鞋有得拎未，如我所料係冇，好在我都諗定冇就補錢買對boot，還掂肥左連腳都粗埋，以前既boot都唔啱著，試到有對係啱我小腿，仲要我喜意既長度，我鍾意boot長到剛掂住我膝蓋。

跟住去〝百佳〞買〝豆豉鯪魚〞，真係貴成20蛟一罐，又買左〝68度湯種高級方包〞，仲比我見到〝果肉脆包〞，同上次〝Taste〞話停產既〝菠蘿果醬包〞大同小異。〝果肉脆包〞係個餡係果醬，而〝菠蘿果醬包〞係包心和包皮中間，搽左一層果醬。

今晚原本諗住買餸煮飯，晏晝老公問我睇完醫生點？老公話我咳得咁勁，今晚吃粥喇！老公未夠6點就詰放工，可能係呢幾晚佢都胃痛，想早點回來休息，叫佢請假睇醫生又唔肯，我就立即去浸米和煲粥。

老公回來問會唔會傳染？大人抵抗力強唔會，但小朋友就會，老公話佢都係小朋友。