Nuoc Mam 碌冧

今日老公要剪頭髮，去剪之前就約熊貓姐姐食個lunch先，因為都係同一區。

熊貓姐姐帶我地去一間叫〝Nuoc Mam〞既食肆，原來係法式越南料理來的。熊貓姐姐話呢到平時好多人要等位，可能今日星期六~少人D。門口都幾靚，裡面又坐得舒適，環境又好，食得又OK。呢到lunch和tea time都係唔收加一的，凍飲又不用加錢，不過，要記住呢到冇〝柯華田〞，因為我叫熱〝柯華田〞，個Waiter話冇呢D野。

〝Nuoc Mam〞點讀？應該係越南話，但唔駛驚，墊檯餐紙上有教你，〝Nuoc Mam〞讀音〝碌冧〞，仲發現到呢間野，係屬於〝鴻星集團〞和〝Dining Club〞，另外仲有3間分店添！呢間應該係新開，因為冇佢個地址。

我原本想吃〝越南咖哩雞飯〞，但怕食咁多好肥，所以都係與熊貓姐姐一樣吃〝越南鮮牛肉湯河配蟹餅〞，而老公唔食得蟹，就order〝越南香矛豬扒蒙粉配春卷〞。

當Waitress放低碗野，我望見裡面既牛肉係未熟，熊貓姐姐叫我快D影相，一陣加左湯就冇架喇！

一壺滾湯倒下，牛肉熟晒，好似回到舊式茶樓〝一盅兩件〞，之後又要攪下碗野，因為碗底有濃湯底。大家有冇留意到個碗，雖然幅相我係影斜左，但個碗本身都係斜架！我都幾鍾意個碗。

〝越南鮮牛肉湯河配蟹餅〞~湯淡中帶微微濃，好飲不錯，牛肉未熟時很靚，熟左之後看落好〝鞋〞，但食落一D都唔〝鞋〞，帶有牛肉味。蟹餅就遜色左D，混雜蟹肉、生菜絲和粟米帶點酸，但吃落有點硬。

〝越南香矛豬扒蒙粉配春卷〞~送上時個湯已在碗中，老公話麻麻地，我試左少少豬扒，都OK。春卷係新鮮炸起，可能係用米紙，所以有D硬。我用米紙來炸過春卷，係會比較硬和煙靭。

〝魚露〞係呢間野自家製的，仲有2種味，熊貓姐姐同事話好食，所以買左1支回家，一支35蚊，一百蚊有3支。

今次冇地址，剛上網搵，資料都係得另外3間，而Open Rice都係得另外3間資料，不過，比我搵到佢個網有興趣可以去呢到〝Nuoc Mam〞睇下，但都係冇我去呢間既資料，我呢間係位於〝荃灣〞，佢個網都係冇資料，所以應該都好新下，未來得切update。