獅子座流星雨@西貢灣仔 Day 1

今次太多雲和煙霞，所以睇唔到，這次係我第2次睇流星雨，唔知係咪與它無緣，2次都失望而回。雖然如此，但今次都玩得好開心，由於平日關係人不太多，計埋我地都係得3個營，仲有一個我地懷疑佢係到住左好耐。

我地每餐不是太豐富，但係樣樣都好好味，尤其是隻〝燒鹹豬手〞，真係回味無窮。另外我整左〝榛果曲奇〞、〝一口蛋糕仔〞、〝輕盈莎莉蛋糕〞，佢地話樣樣都好味，最受歡迎排序如上一樣，〝榛果曲奇〞好快售罄，下次再整，仲要整下其他款拎去大家品嚐。

下個月有另一場流星雨，我忘記左咩星座，朋友們已plan好下個月13號再去，這次會下去3日。今次都有問過開心果姐姐和高達叔叔去唔去？但佢請唔到假，所以下次都通知佢地先，等佢地安排一下。

18 November 2008

今日約左早上11點係〝西貢~百佳〞等，仲要飽肚，所以我就與老公入去西貢撐檯腳食早餐。我地十點就入到去，就慢慢搵下食乜好，左行右行都係去返之前幫襯過既茶餐廳。

嘆完早餐就慢慢行去〝百佳〞，到左不夠一分鐘就見到有AL弟弟從遠處行過來，原來契大佬兩公婆已在〝百佳〞入貨。大家分頭行事，冇耐大眼哥哥都來到，咁就齊人喇！

我地係〝百佳〞門口分裝完畢，就行去巴士站，AL弟弟就去買魚餌。我地坐巴士去〝黃石碼頭〞，然後就call船來接我地去〝西貢~灣仔〞，AL弟弟識得船家，所以好快就來到。

西貢西郊野公園：灣仔~南營地

我地落船見到營地，嘩~好少人丫！平時插針都插唔入，有時多人到要行去西營地，而家都係得2個營和一大班年青人玩集體遊戲。

我地揀左3號營，做根據地，拎左個十人營來，但係只可以瞓6個人，佢地係台灣訂左個新營，我睇左相好靚架！可以瞓到十個人，仲要係營裡面中間有間隔架！可以分開兩邊。

首先舖Pattern紙，再舖膠檯布，起好個內籠，就鎚營釘、拉營繩，左舖舖右整整，就起好個營。

紮好營，住既攪掂緊係到食方面喇！再用Pattern紙舖檯，食污漕左撕去就攪掂。

再加埋AL弟弟帶來的Shelter，就有個舒適既地方食野喇！

呢到就係我地既新居喇！

頭先起營時，一大班青年離開後，跟住班消防都走了，而家剩返我地與鄰居。鄰居距離我地營地60米到，佢就係我地懷疑住左好耐既鄰居，頭先牌坊下的背影就係佢喇！我地見佢燒斷樹木，一問之下，原來尋日班消防燒野，供到有隻青竹蛇出來，所以佢而家又驅趕回去另一邊。

大眼哥哥帶左兩支紅酒來，我都好耐冇飲酒，味道比較濃，都唔錯架！又食我整既曲奇和蛋糕。

果到好大風又凍，所以拎埋另一個燒烤爐既石座來擋風。

起初爐放係檯上煲水，但太大風，所以就將石座移到檯上擋風，一層唔得再加多層。

12點就到營地，再到3點就開始食lunch，lunch食杯麵和罐頭。

食完既packing盒就用來放什物，而個杯就用來當碗用。

大眼哥哥和AL弟弟帶左魚杆，食飽飽就去釣魚，佢地用假魚去釣墨魚，但大眼哥哥不小心，隻假魚就長留海底。

跟住AL弟弟幫我整魚排和餌，佢好犀利不用交剪，只用手捏斷魚餌，攪到成手血，而老公就走左去瞓。我既魚鈎和餌都被魚咬去，冇收穫。

4點幾我、老公、契大佬兩公婆一齊去摸蜆，鄰居頭先都落左沙灘摸蜆，但係好細隻，佢仲提我地而家咁晏要帶電筒，因為好快天黑。

我地想去箭咀果到，由營地經過草叢，再攀石落到沙灘仔，再去石堆諗住爬過去，點知係唔得既，跟住由石堆攀返上去，再由草叢行回出去，去另一條路。

我地行到去〝西營地〞，呢到大過〝南營地〞好多，而且空曠、風又大，咁當然凍好多喇！

再係〝西營地〞左邊行多一段路就到，又行條好斜既沙石路落灘。

箭咀的地方就係我地既營地，我地用營釘來搵蜆，其實粒粒都好細，得幾糖大架咋！但大既比起平時食既都係細好多。

契嫂話蜆明天用來炒蛋做早餐。我地回到去發現又多左一個營，應該係頭先摸蜆時，聽到有人由山上行來，我地估係佢地。

仲拾到舊石，又滑又靚架！拾去用來壓住東西，因為真係好大風，走既時候拋回海中，它浮在海上，大眼哥哥話係珊瑚石。

今晚睇唔到流星雨，但有好美味既晚餐。AL弟弟拎左湯料來，再加埋豬骨，就成為〝青補涼〞，估唔到天寒地凍都有湯飲，飲左暖笠笠。

契大佬晏晝醃左隻〝冰鮮雞〞，夜晚就拎來燒，有美味燒雞吃。

大眼哥哥買左隻醃好既〝鹹豬手〞，晏晝出左水整熟左，等到夜晚就將佢燒和拮，不停重覆呢2個動作，就整左隻皮脆好味既〝鹹豬手〞，好快就消滅左。

晏晝我地幫行山人士call船，所以AL弟弟順手去左船家既魚排到買蟹和魚。佢地話蟹比之前細好多，之前既size係呢隻既double，雖然細隻，但有好多肉，都係烚蟹都咁鮮甜，最衰老公食蟹敏感。我地每人3隻蟹，一共15隻都係110蚊，都唔駛十蚊隻，睇下隻蟹鉗係成條蟹柳咁~yummy。

仲買左條〝石蚌〞，緊係拎去燒喇！我與老公都唔吃魚，但老公都有吃少少，不過，佢地話唔夠油，因為天氣唔夠凍。

最後一味就係〝臘味飯〞，有湯有餸又有飯，樣樣都暖笠笠，仲要飲住紅酒，可以暖胃，但太凍暖左一陣又凍返，寒風剌骨，都要換返件厚外套。睇唔到〝流星雨〞， 大家分配好位置都約12點入營瞓。

待續‧‧‧‧‧