豪食@和花亭

23 November 2008

之前高達叔叔話去〝大埔滘〞影相，不過，就要入場費，但我地一行有咁多人，唔多划算，所以最後去左由開心果姐姐提供既〝南蓮園池〞，〝南蓮園池〞係〝志蓮淨苑〞附近。

今日地一行8個人，主要係我、開心果姐姐、肥阿哥和高達叔叔去影相，仲有老公、阿嫂、娣婦和阿B，肥仔O.T.通頂，所以唔打擾佢嘞！我地等齊人就去左〝鑽石山~荷里活廣場〞food court食野。

大家享受完lunch後就起程，經過〝零食物語〞，阿嫂買左2盒熊貓玩具比阿B玩，之後肥阿哥見到廚窗擺放〝海盜船〞，就將它買下，但成二百幾蚊我就唔捨得，肥阿哥仲買埋coupon，即時可以入會，跟住即時有折扣和送多50蚊coupon即時可以扣減。

我地入到〝南蓮園池〞，天氣都好熱，我都影到一身汗，衫又濕晒。肥阿哥應承左阿媽回家吃飯，影到差不多尾聲，阿B唔知係咪整到，所以喊得好勁，而且加上佢又眼瞓和肚餓，所以肥阿哥、阿嫂和娣婦就帶阿B回去，而我、開心果姐姐、高達叔叔就繼續。

我地再上埋〝圓滿園〞影下、行下就走人，大家又返回〝荷里活廣場〞坐下、傾下計。我地緊係傾影相既野喇！我見到老公坐係到瞓，呢個topic唔多啱佢，所以我就叫走人。之後入左去〝三聯〞睇書，就被我發現到呢D手作仔，之前見到好多Blog友整都好鍾意，但一直冇專登去搵，今次見到又唔貴，就買左2盒。

大家未知晚餐吃乜？所以就係〝荷里活廣場〞外面坐低傾下，最後決定去AMP食壽司，有兩間選擇〝和花亭〞和〝板長〞。

〝板長〞我未食過想試下，但去左人山人海，攞左票仲有二幾三十張就到，咁緊係分散投資喇！再去〝和花亭〞拎位，見到外出得幾個人以為好快到，點知呢到轉左又係要拎票，不過，都係等幾張啫！大家係外面坐下，等到咁上下老公又落去〝板長〞睇下到未。老公匯報仲有幾張到，〝和花亭〞都仲有2張就到，係大家傾緊落唔落下等之際，〝和花亭〞就叫我地。

今次叫左好多野食，大部份都係金色碟，金色碟要二十幾蚊一碟架，食左12碟，但未計其他啵！我地唔止食左相咁多碟架，有D我冇影到。

今個月推介係呢款，一件只係6蚊咋！忘記左咩名，好好味，所以我地encore左一次。不過，今次既餡料冇以前咁大，水準差左，下次真係要去〝板長〞試下先得，老公話〝板長〞抵D。

結賬後，單價每200蚊就有一張刮刮卡，我地差D又可以多一張，有2張〝第一獎〞~有抽獎卷和電話繩一條，另有一張〝第4獎〞~下次可以食35蚊以下壽司一客。等車回家時我問老公‧‧‧

我：今日悶唔悶丫？
老公：悶。
我：邊Part悶呢？
老公：Part Part都悶，呢個話提唔啱我。