為了心頭愛@老公

今朝起身整左〝清新檸檬蛋糕球〞來打發時間，諗起老公要去〝美孚~九巴客戶服務部〞買巴士，不過，我又諗不如去〝荃灣〞喇！果到都有，同埋可以約熊貓姐姐食lunch，又可以拎D〝清新檸檬蛋糕球〞比佢分甘同味嘛！

我趁老公去〝殊殊〞就同佢提意一下我既諗法，佢同意後又上床眠。我又問佢仲有冇唔舒服？事關尋晚佢唔舒服，臨瞓前食左粒強效，佢話而家個頭好痛。佢眠眠下突然話早D去買巴士，於是我就嘭嘭聲去洗頭，然後又約熊貓姐姐，老公就自動起身。

我地去左〝荃灣~九巴客戶服務部〞，老公想買〝富豪奧林比安11.3米〞剩返有Damage既Display，尋日一出已售罄，店員幫我地check機其他舖有冇，又打電去問有冇貨？又問埋靚唔靚仔？好多都售罄，藍田仲有2架，但天水圍既天恆剩最多。臨走前問其他舖電話，但只限內部打，只要打去hotline問就可以，店員就比左份收費表我，收費表內有hotline電話。

我：既然你咁鍾意，去天水圍有乜所謂啫！呢到去都係9個字好快咋嘛！
老公：咁一陣食完飯，再回來問。

大家唔知去邊到食，老公就提意去返〝Nuoc Mam 碌冧〞，我地去搵位等熊貓姐姐來。

老公與熊貓姐姐order〝越南生牛肉河粉伴水晶丸肉卷〞，上次我都係食呢款，不過，就伴蟹餅。今次拎來時碗內已有湯，佢地覺得個湯好好味，熊貓姐姐仲差不多成碗飲晒添！

我就order左〝香露燒鴨胸焗飯〞，個焗飯好香，大家試左都話OK，個汁好味帶有微微椰香，又有我最愛既芝士。燒鴨胸其實係煙鴨胸，但係份量都唔少架！

食完飯就趕回去〝荃灣~九巴客戶服務部〞，因為間野lunch time係2點，我地入去再問多次頭先既問題，店員打左去藍田問，果2架都唔靚仔，但天恆仲有貨，不過就冇老公想換既巴士。我問可唔可以tran.過來，但佢地未試過咁做，我再諗到另一個方法。

我：我買左你display果架，然後去天恆換得唔得呢？
店員：若果唔係人違既問題係可以換既。
我：咁可唔可以一定換到呢？
店員：我唔可以答你，但係唔係人違就可以。

老公都同意我既做法，所以佢就買左〝富豪奧林比安11.3米〞display嘞！臨走前我地每人填左份意見書，老公話我〝駛唔駛寫咁多丫〞，咁個店員真係好丫嘛！我地阻住佢既食飯時間，仲要服務我地期間，又有一個人入來買野，我地走個客都未走，不過，佢都做多幾百蚊生意。

之後入天恆換左架好靚仔，天恆果邊話今早先買左4架出去，我諗再遲既話都冇喇！

今年提早左做聖誕Promotional，老公加錢換左聖誕Promotional〝丹拿珍寶 Baco@平頂珍寶〞和未完Promotional的〝丹尼士祖比倫〞，仲買多兩架迷你巴士〝利蘭勝利二型@迷你巴士〞和〝丹拿A曼徹斯特車嘴@迷你巴士〞。

今日老公就係買左呢幾架巴士，佢仲想換埋架〝299〞，不過，冇晒貨。我諗唔係因為呢個原因，老公都唔會入天水圍，因為佢成日都覺得遠，但我就唔覺，我以前星期六、日都會入去朋友仔到住。我原本想搵下朋友仔，老公又唔舒服，所以都係下次先。