多次感動

今日與十多年冇見既朋友見面，佢約左我早上11點半係銅鑼灣見，我最憎過香港，唔好問我點解，因為我都唔知，既然朋友叫到去邊都冇問題喇！

我到左中環港鐵站就打比朋友，等佢預番時間前來會合，朋友問我想食乜？越南、泰國、西餐‧‧‧，我只係想要靜D既地方，因為我不喜歡多人，佢就提意去〝富豪酒店〞食西餐，掛線後心諗唔駛去咁貴地方吃丫嘛？到時見到先提意去另一到。

我係街等左15-20分鐘朋友就到，原來朋友叫我到左再打比佢，但我聽唔到，本來仲有個朋友來，但佢要夜晚先得閒，而家佢地兩個一齊做生意。我地邊行邊傾，行行下我同朋友講〝我可唔可以攬下你丫？〞，大家都停步攬攬，當時我真係眼泛淚光。

朋友原來係帶左我去〝富豪酒店〞下面個商場食西餐，唔係去〝富豪酒店〞吃，真係嚇死我丫！我地去到未開門，問左開12點，仲有幾個字就帶左我去佢公司開左〝SPA〞睇下，但又係未開做緊清潔，然後再返回餐廳，我地企係人地門口傾到佢地開門就入去。

餐廳門口放左張籐倚。

裡面裝修好簡單，而鏡下面又放左好多雜誌供人閱讀。

我order左〝意大利香草吞拿魚檸汁意粉〞，朋友話呢個幾好，我試過真係OK。

朋友order左〝日式海鮮本菇意粉〞，朋友話下次唔好叫呢個，因為有好多殼。

我緊係飲熱檸水喇！減肥唔好飲凍嘛！仲有蒜蓉包送，意粉大家share，呢間係用Open Kitchen，所以可以見到佢地煮野。

邊食邊傾，有時傾到我又眼泛淚光，我吃完味精勁既野，個口就會好苦，所以呢間味精應該都幾勁。

之前幾年佢寫左封信比我，但佢忘記左呢封信，我就拎出來比佢睇，因為我尋日回娘家攞回來，佢拎左封信話要回去研究下，但我怕唔知幾時再見，又怕會唔見左封信，佢見我咁驚就叫我上佢公司copy後就比返我，順便了解下佢公司，咁我就知咩事嘞！

佢個partner未得閒開緊會，佢想去〝LV〞買袋，佢就帶左我去，這次係我第一次去〝LV〞，佢要既野冇貨，但係個價好貴，我一定唔會買和唔捨得買。

朋友係做緊〝網絡經銷 〞，呢間我3、4年前另一個朋友都叫我去過，即係今次係第2次聽，一聽就2個幾鐘，我一路聽個心一路諗點拆，而且老公都唔喜歡呢D野，我好留心聽，聽到我有D眼瞓，最後朋友都係忘記copy封信，佢話下次見到先比返我。佢地已講定下次function，但我冇應承只係〝嗯~嗯~嗯~〞，下次拎封信時，我又怕朋友再同我講，到時都唔知點好。

朋友本身係開左間boutique，但佢做左呢盤生意後，收穫唔錯，所以佢間boutique而家開始散貨，散完就關門大吉。

其實，早在十幾年前，我因為唔知點推和唔好意思，花左幾千蚊加入左傳銷做左會員，但我從冇sale過人，只係自用，所以就算今次老公首肯我入，都係唔會有乜作為。

我又問佢另一個朋友電話有冇改，我就update返，我回到家就打比佢，呢個又係十幾年冇見和聯絡，原來佢唔見左2次電話，所以一直都冇與我聯絡，我又一心以為佢嬲左我，亦都冇搵佢，今日傾電話真係有好多野想同佢講，講講下我又眼泛淚光，我唔講朋友都知，因為佢太熟悉我喇！所以約左佢下星期食飯。

雖然，今日悶左好耐，但係我解開左我心中2個結，希望可以快D解晒所有結喇！