北海道手信@2008

22 November 2008

今朝約十點開心果姐姐來電，佢問我而家打唔打波？佢與同事book左羽毛球場，十點係我家附近，有波我緊係去打喇！

我立即執行裝、換衫，老公叫我回家先洗白白，我原本諗早15分鐘離場，但係我太喜歡打波，所以只係早5分鐘，之後急急腳回家洗白白，因為我地一早plan好11點就出發去街，今日好忙要去好多地方。

今日我上左去朋友屋企拎運動服，又坐下傾下計，然後就一齊走，因為佢囡囡要去學野。我接左貨，跟住就要去散貨，首先約熊貓姐姐食lunch，再交貨比佢，然後又要等高達叔叔電話再交貨。

我地食完就上左熊貓姐姐家〝har下〞等，但佢公司今晚要吃飯就唔到，咁就明天比佢，我地明天約左去影相。講開影相，一陣去肥阿哥到拎部〝D40〞明天去影相，明天娣婦和阿B都會去，但肥仔未知，我都約埋肥阿哥，仲上網比佢睇明天既場境，D相人地影得好靚架！但要明天先回覆。

跟住就約開心果姐姐交貨，然後就去肥阿哥家交貨和拎手信，肥阿哥、阿嫂和Benz哥哥兩公婆剛去完北海道自由行回來。

我地上到去原來仲有肥阿哥2個同事，有Benz哥哥就一定係打邊爐，今次呢個係〝譚魚頭~番茄湯底〞，食剩好多丸。每次見到Benz哥哥都講笑，笑到我面珠都酸軟。

呢對即棄木筷子係日本架！打完邊爐老公就打機。

我叫左阿嫂幫我買2樣野，係之前聽〝李力持〞介紹既，第一樣就係〝薯條〞，要係〝北海道~千歲機場〞先有得買，因為係用北海道既〝藍爵薯〞做的，仲要係排晒長龍每人只可以買一pack，但阿嫂話果日可能平日不用排隊。吳君如現場食左話好有薯味，頭先大家都有試食都話好味，薯味夠，味道又適中，感覺不是太多味精和添加劑。

第二樣係〝粟米〞，佢話日本D野食係計甜度，越甜就越貴，所以我都叫阿嫂唔駛買咁甜，而且貴就唔好買。

另一樣食得既手信~士多啤梨牛奶朱古力。

阿嫂又比左2包〝薯仔湯〞我試，又係薯條果間出品。

有食得既手信，咁緊係有唔食得架喇！我既米奇袋。

肥阿哥話冇龍貓巴士，所以買左呢架送比老公，阿嫂話呢架阿B就啱玩，不過，唔緊要喇！心意嘛！

呢個袋阿嫂係日本買架！我見佢幾得意，所以影下佢囉！