我的〝25L〞背囊

今朝半夢半醒聽到電話響，即刻衝落床聽，肥仔約左肥阿哥一陣去飲茶，問我去唔去？望下個鐘十點，佢地11點出發，我就立即去梳洗，再叫老公起身。

我地落街配左條洗衣機膠喉，因為呢幾日洗衣機漏水，老公尋晚睇過，係條喉爛左。我諗住拎埋條喉飲茶，但老公話要拎回家，佢怕整爛，早知係咁我就唔駛拎埋部Notebook落去喇！

我諗住係行路去酒樓，但老公又話要搭車，平時都係行路，可能尋日打波肌肉酸痛掛。我可能平時有抱開阿B，所以今次打完波肌肉冇以前咁酸痛。

流沙奶黃包真係好〝流沙〞，一咬就流晒，要食得好小心，平時凍左都唔會咁流。

我地飲完茶行去搭車，經過公園，阿B係公園玩左一陣，老公都睇左一陣就回家整洗衣機。之後就回肥阿哥家，老公就自己去，肥阿哥買左正版Office幫我部Notebook裝。肥阿哥買左新〝地心探險記〞和〝奪寶奇兵~水晶骷髏國〞，睇完〝地心探險記〞阿嫂落左街買茶餐外賣，回來再睇〝奪寶奇兵~水晶骷髏國〞，呢2套都好好睇，老公食完個〝炸脾茶餐〞就開始胃痛。

突然，肥阿哥話我有個〝25L〞背囊係佢到，我有個〝25L〞背囊？真係抓晒頭，肥仔都話佢都用過，我見到實物都仍然冇印象，肥阿哥話帶佢去左好多地方，最後一站係〝北京〞，個行李牌都係剛剛拎走。

我睇睇下，又摸摸下，又好似有D印象咁啵！我應該只係帶佢去過2次露營，同埋有影過相，太耐真係唔記得左。

我仲諗緊2星期後，露住營睇〝流星雨〞用咩背囊好？而家可以用佢喇！老公未知請唔請到假，若然佢請唔到我都會去，因為有好耐冇咁樣親近大自然喇！