不請病假的老公

今日老公終於要去睇醫生喇！不過，要去佢以前屋企樓下睇，因為佢睇過好多個都唔得，只係得果個夾到佢。

我堅持要陪佢去，因為我怕佢途中有咩事，而且唔舒服緊係想有人陪人架喇！但老公話只去睇一睇，來回都成十幾二十蚊車費，佢叫我等佢回來時，落街食野咪得囉！咁我就唯有等，過多一陣佢又問我〝你可以幾耐出到門口丫？〞，我立即嗱嗱聲去洗頭，只係用左約20分鐘就出門，以前我要1粒鐘架！

老公打左去診所預約左11點半，但係路程遠差不多12點先到。診所內有好多人，有個手抱既BB，我諗得幾個月大，佢病不停扭計，我見到佢就諗起阿B，阿B病咁多次可以話冇扭計，次次都係診所和醫院走來走去，叫都叫唔停。

老公等多3個就到佢，醫生房細我冇陪老公入去，醫生話老公〝氣管炎〞，要食D好勁既藥，成個喉嚨腫晒，我一聽到就‧‧‧

我：你叫醫生寫定明天病假紙，以防萬一。
老公：唔駛。
我：你拎定唔一定要放架嘛！你知你自己幾孱先得架！
老公：氣管炎咋嘛！唔駛請假。
我：明天你真係要放，又要返來拎，到時又麻煩喇！

我都知佢唔會請病假，所以佢一向都冇攞病假紙，除非真係病到就死喇！但我聽到佢咁講有D擔心，佢死都唔肯拎定病假紙，所以我都有D罄架！雖然，老公做到對公司冇心機，但佢絕不會輕易請sick leave和annunal leave。

我地搭車回家附近吃魚蛋粉和牛腩河，我吃完唔等老公，放低key比佢回家，我就去〝三聯書局〞睇下diary refill，趁機又睇下有冇DIY Cake，又被我搵到另一系列，不過得返一款，〝三聯書局〞既野平過〝大眾書局〞好多。

頭先搵diary refill時，突然有人與我〝Say Hi〞，抬頭望原來係尋日(為了心頭愛@老公)〝荃灣~九巴客戶服務部〞個店員，搵唔到想要既我又〝Say Bye〞就去另一到搵過。

今日阿媽生日會出街吃，好在我冇話負責煮飯咋！因為老公病左要抖下，若然唔係我就要早早回娘家預備。