獅子座流星雨@西貢灣仔 Day 2

欲知前提如何請到：獅子座流星雨@西貢灣仔 Day 1

19 November 2008

尋晚大家都瞓得唔冧，契大佬瞓營口，佢仲起身用紅酒樽掉野狗，成晚野狗有時打交，有時又叫，又成日係營附近行，所以邊有得瞓。大眼哥哥瞓最入，有時大風到將佢活埋。

今朝7點我見到契大佬起身，我就立即起身，因為我一向係陌生地方都係唔瞓到，一出營營口倒塌左一邊，shelter又塌左一邊。我以為契大佬起身，原來佢去〝殊殊〞咋！佢等埋我去完〝殊殊〞就回營，回到去就整返塌左既地方，整完佢就叫我去梳洗，因為佢唔瞓，可能整完凍到醒晒！

我見契大佬拎尋晚浸左個飯煲來洗，又傾下計，傾傾下見到契嫂又起左身來梳洗。我見肚餓想食零食，契大佬就起爐等我燒麵包吃。跟住大家陸陸續續起身，未夠9點就起晒身，最奇怪係老公都咁早起身。

大家燒麵包吃，我燒左塊包比老公吃。每人有2隻蛋，我見AL弟弟整腿蛋治，我就叫佢幫我煎蛋和火腿，等我整個〝火腿蛋多士〞~好味。後來我叫老公煎隻蛋比我整多份，佢居然話唔識煎，以前牛扒又識煎比人食，我只吃過老公煮既公仔麵咋！咁唯有我自己煎喇！

跟住我又煎多塊火腿比老公夾〝香草包〞。

又有人煎荷包蛋吃。

契嫂要吃蜆煎蛋，契大佬就煎比大家吃，雖然蜆細隻，好有蜆味~正。

食完早餐各自活動，有人睇書、睇報紙，而我與AL弟弟就去釣魚，老公都有來搵下我，我問佢點解咁早起身，佢話因為急，所以佢睇完報紙又瞓過。

我發覺〝cake〞石，但又整唔甩，而AL弟弟又行左去另一邊，我見契大佬係遠處就救求，佢一來到我就甩到絲，拉上來就見到佢喇！契大佬話佢係〝石九公〞。佢都吃不到我的餌，應該係我拉絲時唔覺意鈎到佢。

我影完相，契大佬幫我脫鈎，然後去拎海水幫我養住佢，但AL弟弟冇收穫，之後老公就幫我放生佢。

我再鈎冇耐又〝cake〞石又救求，最後都係鈎和鉛都冇左，我唔想嘥野，所以唔鈎，大家傾下計。見到有獨木舟係左邊划過來，向住尋日摸蜆既沙灘進發。

頭先一直煲緊〝皮蛋瘦肉粥〞，嘩~好綿丫！我就去叫老公起身一齊食，AL弟弟話鹹蛋唔鹹，其實早在中秋節時已係咁，D灰都未乾就拎出來賣。

鄰居有時與我地傾計，有時又去另一邊營傾計。鄰居由對面營過來，佢話佢地剛鈎到好大隻〝墨魚〞，有成個足球咁大，仲話〝佢出豉油、人出雞〞，因為佢手上拎左好多醬料，我地又過去八下，嘩~真係好大隻，隻野有前臂咁長。

跟住就叫AL弟弟和大眼哥哥再去努力，佢地去返人地鈎到既位置，我與老公離遠望住佢地，老公見到有野狗虎視眈眈我地營地，契大佬兩公婆又瞓左，所以就回營，之後契大佬起身，我與老公就去眠一陣。

眠眠下，張開眼見到大眼哥哥話鈎到，我立即起身去睇，但係就冇人地咁大隻，係2/3隻前臂咁大，都好過冇喇！辛苦佢地，因為果到冇風又曬。AL弟弟宰完就拎去炒，攪到佢成手黑墨墨。

頭先睇鈎墨魚時無聊影，第一幅左邊係我，右邊係老公；第二幅左邊係老公，右邊係我，睇下我與老公身形差幾遠。今早同契大佬傾計都問過我，邊個叫我減肥？我話自己覺得肥，老公又話我肥，所以咪減，我話佢知我點減，佢怕我唔夠營養。佢都話唔見我一排，上次〝暢談@泥涌〝巴比橋〞〞見到我仲肥過初相識，成個人都橫左好多。

我地將所有野不論零食或飲品都消化晒，還欠娃娃菜，我地都將佢白烚吃掉了。

臨走時有好多牛出動，佢地話最多見過呢到有二、三十隻牛一次過出來，有次牛牛去其他營地偷野食，有個人拎支棍打落牛牛前腳，牛牛痛到大叫和亂衝，向住佢地營地衝去，中途〝click〞到營繩，跟住與一班牛牛走佬，仲邊走邊叫，叫得好淒慘。

清潔個營地，收拾行裝都成4點幾，AL弟弟call朋友個阿媽載我地，因為朋友有事在身。

若果你唔call船都可以坐船，不過，只係假日先有船。

我地又返回黃石碼頭坐巴士去西貢碼頭，跟住就去食個茶餐，契大佬兩公婆想買墨魚回家整〝炸墨魚〞，就行去碼頭睇下，但太晏乜都冇。係碼頭見到有人捉到〝八爪魚〞好大隻架！