這幾天痛到不能‧‧‧休息一天

9 November 2007

肩頸比平時痛、條腰有D酸軟

。

10 November 2007

肩頸腰痛未減，仲痛到連帶頭都痛埋，痛集中在我右邊全身，左邊只是某一部份痛，我最怕頭痛~好辛苦

。

11 November 2007

起身未有好轉攪到成個人乜心機都無

，但一陣要去摯友的飲宴。入席後坐坐下有D暈暈地

，好在撐得住，飲完老公會接我。回家途中老公問：「有冇打比你阿媽，回覆明天去唔去飲茶？」，我真係忘記了，因為頭先趕住換衫出門口，老公幫我聽左阿媽來電，頭先阿媽問我：「明天去唔去飲茶？我等阿B飲完奶後，再打比你你先出門口，咁你就唔駛咁早起身。」，跟住我就回覆她〝去〞。

12 November 2007

今早9點到阿媽來電。

阿媽：你未起身丫？阿B剛飲完奶。

我：未丫。你地有幾多個人去？

阿媽：我、阿公、阿婆、阿婆朋友、阿B，肥仔唔去。

我：你今日休息？肥仔唔駛返工咩？

阿媽：我係休息，肥仔話放假。

掛線後，我再係床〝典〞多一陣，因為今日仲嚴重過尋日~骨又痛頭又痛，唔想郁。屋企有咁多人，所以我想休息唔上去，打比老公問下意見。

我：「今日我唔返上去好唔好丫？今日阿媽&肥仔都放假。」

老公：「咁多人你又唔舒服唔好返上去。」

跟住又打比阿媽。

我：「一陣我飲完茶唔返上去喇！」

阿媽：「點解丫？唔知一陣係咪同阿B去睇醫生喎？」

我：「睇隻眼丫？」

阿媽：「係丫！」

我：「叫佢地睇醫生就打比我。」

佢地比我早去到酒樓，阿B一路望住我行入黎坐底，跟住我叫佢唔應，阿B扭我就同佢去左出面遊樂場玩左一陣

，跟住入返去就見到阿公拎實張點心紙唔放預備結賬，我抱住阿B又搶唔到，唯有等待機會，阿公行左出去比錢，我就叫阿媽抱住阿B跟住出去，之後阿媽又加入戰團又爭比錢，我一邊拎錢一邊叫經理唔好收佢地，原來佢地有預謀，2個一早分別拎定錢，將D錢放係張單上面經理都唔收，仲話〝等D後生比〞，好在經理幫我咋！跟住有個師奶行過〝嘩！咁多人既，老、中、青爭比錢〞，這位師奶好似與阿媽是相識的~見佢地有2句野講。

我地成班人再同阿B去遊樂場玩，老人家又開心阿B又開心

，阿媽問我點解唔返上去？我話唔舒服，之後就散隊喇！我去左〝百佳〞買野，在商場內已經有冷氣，而我又冇著外套，但都不停流汗

，回到家仍然流緊，摸個額頭是凍的，我諗我係流緊淡汗，於是我用手指捈少少汗試味~果然汗是淡的，淡汗很久沒流過，記憶中中醫話過流淡汗對身體不好，因為淡汗即是血，弊啦！我流緊血丫~

終於，到下午3點幾撐不佳吃左粒〝長效〞。晚上老公放工問我吃什麼，我真係諗唔到，老公提意煮〝牛肉烏冬〞、〝煎牛扒〞，我問邊個煮，答案竟然是〝病人~我〞，最後大家食〝吉野家~牛肉飯〞。

肥仔來電問我明天如何，我緊係湊阿B喇！明天可以唔湊阿B，娣婦明天可以放假，不用放假，明天應該冇事架喇！希望在明天丫麻！