日式咖哩薯仔雞翼 (內附食譜)

我打開雪櫃發現仲有半盒日式咖哩磚，到期日係下個月1號，我為左唔想浪費，娘家長期有雞翼係冰箱，其他材料又齊，所以就煮成〝日式咖哩薯仔雞翼〞。

今晚約左熊貓姐姐吃飯，所以我冇吃，只係試左味，味道都唔錯。夜晚我打回去問下意見，肥仔第一句就話〝好味〞。

食後感：

肥仔：好味，有咖哩味，但撈飯汁就唔夠甜。
娣婦：好味丫！夠甜喇！肥仔食得濃味，我就夠甜，但薯仔唔夠腍。

日式咖哩薯仔雞翼

材料：

雞翼                         8隻

薯仔 (細)                 1個

番茄 (細)                 1個

洋蔥 (細)                 1個

汁料：

日式咖哩磚             半盒 (吉之島十蚊店果隻)

糖                             1 – 1 /12湯匙

鹽                             1/8茶匙

水                             適量

醃料：

生抽                         適量

糖                             少許

胡椒粉                     適量

生粉                         適量

油                             少許

做法：

1.          薯仔、番茄切件，洋蔥切方塊，備用。

2.          雞翼洗淨抺乾，用生抽、糖和胡椒粉醃5-10分鐘，然後加入生粉和油撈勻。

3.          鑊下油將薯仔煎至表面金黃色盛起。

4.          洋蔥爆香盛起。

5.          雞翼鑊煎至表面金黃，然後下薯仔、洋蔥、水和咖哩磚，水剛剛蓋過材料就可以。

6.          待火滾後加入糖和鹽調味，自行試味。

7.          用小火燜20-30分鐘，中途要不時攪拌，即可上碟。

煮後心得：

l            醃雞翼不用太多糖，怕煎時會易燶。

l            薯仔要切小舊，因為不是燜得太耐，大舊會燜不腍。

l            水份不多要不時攪拌，以免黏底。