行Catwalk‧髮廊剪髮~第一次

阿媽話帶阿B去樓下髮廊剪髮好耐，今日終於有時間可以去，阿媽話自己帶佢去，我話等埋我，你一個人點攪得掂佢，其他人都同意。係出發前為食阿B見到太公食野，緊係走去分一杯羹先喇！

阿B去到都係周圍望下都冇咩異樣，阿媽就抱住阿B預備剪髮，師傅一拎起個剷就立即變臉，開始扁咀伸手要過嚟我到，再耐D周圍郁又喊，繼而流出眼淚、鼻涕，又再一次向我招手，我緊係唔抱佢喇！抱左仲駛剪既。

我行去幫佢抺頭髮絮，佢D眼淚、鼻涕又黏住D頭髮絮，又周圍郁怕佢食左，剪完我抱佢就即刻收聲。

雖然如此，但走既時候佢都有送〝飛吻〞比髮廊內在場各個人仕。

返到屋企阿媽立即去開水預備幫阿B洗白白，佢自己要除衫，可能係D頭髮絮吉住唔舒服。

洗完白白，原本坐係架車到好乖，但坐坐下就開始嚟料喇！蠱蠱惑用個下巴掂住架車，然後伸隻手仔攪控制架車左右既軸。

你睇佢樣幾寸坐得又寸，將一隻腳仔放上架車架中間，一時又睇野扮晒大人咁款，好似明張紙講乜，真係比佢笑死又激死。

好喇！玩完架車就到鬆展筋骨，落地行下先，佢不停係廳與騎樓中間穿梭，似唔似行Catwalk，而家唔駛扶野上落，行行下停底用個樽去敲厠所門~Bong~Bong~Bong，冇人應，佢想望入去厠所裡面，我地就制止左佢，哦！鹹濕仔，唔可以架。