第42屆工展會

25 December 2007

今年係〝第42屆工展會~ The 42nd Hong Kong Brands & Products Expo〞，每年我都去捧場，但係上年唔得閒冇去，今年老公一樣都會陪我去，我地仲約埋高達叔叔今日一齊去。

我與老公等左好耐小巴都冇車，一向不喜歡搭地鐵的我都要破天方搭地鐵，如果唔係就會遲到。我入閘後老公話有野派，原來係派這塊所有鐵路路線圖，還有聖誕老人派糖，我仲見到有人與聖誕老人影相添。

我地約左係灣仔等，我地一齊吃過早餐+午餐，食飯時打左比肥仔問下阿B點樣？阿B食得訓得沒有什麼事，而且連〝四大長老〞都知，死喇~後日返去會點呢？真係唔敢想。

由於高達叔叔對〝工展會〞興趣不大，他只是陪老公行行，所以就決定行一陣街才去〝工展會〞。我地去左太原街，還有幾個場商場睇扭蛋、玩具、模型。

前幾日阿婆講過〝佢而家用緊既鎖匙銀包又方便又好用〞，這個匙包係我係太原街買，等我今次去太原街再買多一個比阿婆先。點解我會去咁遠買一個匙包？事原有一次阿婆個匙包爛左又買唔到，她自己用針線縫補再用，阿婆想要的匙包很少地方有得買，再加上出面D款式阿婆不太喜歡。剛巧有次我與老公去太原街睇扭蛋比我發現有間街舖有這類匙包賣，之後阿婆所用既匙包我都係這裡買，因為有阿婆最喜愛的款。這款匙包有3格可以分別擺放：鎖匙、散子、紙幣。

離開太原街去另一個商場途中經過〝吉之島~10蚊店〞，我梗係入去逛逛喇！終於比我等到又搵到你喇！這款是我最喜愛的蛋撻模~開心到飛起。

頭先係太原街見到架我未見過而又冇〝Tomy~米奇車〞，老公話行多幾間格價先買，但係走左先記得，老公話去睇下其他模型舖有冇，我地睇到有但貴好多，最終都係冇買，咁等下次有緣先。

我地由灣仔行到去銅鑼灣，下午4點就去到〝工展會〞場，真係〝人山人海〞〝插針都唔入〞，每次嚟到都會去食下野，今次我可以食到我想食左好耐既〝士多啤梨冰糖胡蘆〞，自從係台灣食過就冇再食，不過我知香港都有，但係我又見唔到係邊。始終不及台灣，這條已雪到硬沒士多啤梨味，只得甜。

這是〝鴻星~蟹粉小籠包〞，上年都有幫襯過唔好食，今年又係一D進步都冇~失望。

這個就係10個候選〝工展會小姐〞其中一個，因為佢前面有一班男仕影梗佢相，所以我只影到側面，後來佢知到我影佢就轉左過嚟我這邊。

行到天黑再食埋這包煨魷魚，再食埋〝鴻福堂~燕窩楊枝甘露〞就行返轉頭買要買既野喇！

我係新東陽買左去台灣一定會買既〝新東陽~太陽餅〞，我地當場開嚟食，因為老公未食過，如佢覺好食就買多D，但係我好失望，因為大部份都係皮，得少少餡，所以買左一盒，一盒有4個。

這都是新東陽出品的麻糬、鳳梨酥。

老公突然好眼利睇到〝二德惠〞有Booth，我要行到好近先見到，我都買左個果凍模，有時懶得去買，所以買定先。

又去左〝嘉頓〞買我與老公都喜愛的產品。

再去埋〝李錦記〞買這三款醬：香草番茄醬、韓式地獄辣醬、和風照燒醬，還加左10蚊有一支〝細唧唧裝蠔油〞，仲有贈品磁貼、蠔油新煮意CD、唧唧餐食譜。

我地離開左〝工展會〞去左Times Square，不過沒有想像中咁多人，燈色都沒有什麼特別。

之後就要決定晚餐在那裡吃？吃什麼？我地諗左好耐老公決定去金鳳据扒，係行去搭車又路過另一間〝10蚊店〞，我見剛錯過左一班車，所以我就可以入去行下喇！今次買左一包小食比娣婦，再買多包味噌湯既湯料。

我地行到去金鳳，但實在太多人我地路過就繼續向前行，目的地就係西九龍，我地一直行沒有停過，因為唔知點解我地行到去紅燈轉綠燈，直到有個師奶截停問路停左一陣。最後我地去左〝金太郎〞食晚餐。今日真係行左好多路，大家都有D疲累。