24 December 2007
雖然，今日係平安夜，但對阿B嚟講一D都唔平安。
話說今日老公放假，想帶阿B去行下街，我地就回家接阿B去與熊貓姐姐食lunch，回到家中阿媽剛與阿B飲完茶回來，他開始有些睡意，阿媽話佢頭先〝哼〞爤左酒樓隻瓷匙，仲要分開左幾截。我執好阿B既裝備已差不多12點半，因為熊貓姐姐1點食lunch，所以我地搭的士去。
阿B成日都好含蓄望住熊貓姐姐，熊貓姐姐都話佢好似好怕羞咁，吃完離開後一齊行既時候見到熊貓姐姐的同事們，但唔知點解阿B見到佢地有D想喊咁，平時都唔會咁既，係走既時候叫佢錫熊貓姐姐，佢都錫左一啖。
我地就去〝荃灣~吉之島10蚊店〞行街買野，順便去荃灣廣場的室外遊樂場玩。阿B好似唔多歡喜用背帶，所以去到就租左架BB車。我去10蚊店，而老公推阿B係附近行，阿B扭唔想坐車，我就抱左一陣，原本見佢眼訓諗住買完野回家，但係見佢扭計，又難得出街，都係去公園玩一陣。
原本老公想我陪阿B去玩，但我骨痛又頭痛就叫老公陪阿B去玩，我就坐係最後的長木櫈看住架車和袋。
初初我都見老公跟住阿B走嚟走去，去玩滑梯，又去搖搖板那邊，我都想過過去一齊玩，但如果我推住架車，拎自己手袋、老公個袋、阿B袋裝備，阿B裝備個袋真係一個手提旅行袋的size會攪到好狼狽，唯有打消這個念頭。再坐多一陣見阿B玩得咁開心，我又坐得好遠看得不太清楚，又想幫佢影下相，所以決定都係推埋架車、拎埋D野行過去。
正當我執緊野既時候，我抬頭望下佢地係邊，見老公抱住喊緊既阿B過嚟，我立即上前睇下咩事，未行到埋去見到阿B右邊嘴角以下都係血，老公件衫都有血，而阿B件衫有少少血，我問老公咩事阿B流咁多血，老公才知道佢流血，見阿B咁樣流血大概都知是邊到有事。
我抱過阿B後掀開上唇用紙吸了一些血，又叫老公用水抺下件衫既血，但吸完又再流、阿B又喊不停，所以我忍不住哭了出來，之後就立即執野同阿B去睇醫生，再叫老公打比肥仔，但肥仔冇人聽，跟住我電話響，肥仔來電報告他現在收工，老公亦匯報這件事給肥仔知，再叫肥仔通知娣婦，娣婦放工後來診所搵我地。
出公園前血已停，入到商場阿B已經手指指表示要去這裡、那裡，已沒事，但我看到他的鼻內有血，死喇！唔知會唔會撞壞個鼻，坐的士時我再問老公發生咩事。
阿B走嚟走去，走去玩滑梯，跟住又走去個公仔到，但走到去距離公仔2、3步就停左，之後用手指指下隻公仔再行埋去拍打幾下，又走去玩滑梯，如是者這動作都重覆做左2次，初初都沒什麼，但第3次就出事，又係玩完滑梯後走去公仔到，雖然這次都係距離公仔2、3步停左，但突然衝埋去公仔到，我來不及反應阿B就撞落公仔個肚腩，繼而彈後坐左係地下望住我一陣就喊，我抱起佢就僕落我到，所以件衫有血，跟住行返去你到，你講我先知佢流血~嚇死我，我好驚佢係撞爆個頭。
我地搭的士去醫生到，雖然醫生開4點，但早D去到可以早D睇，終於在車程中阿B睡著了。3點半已到達診所門外等候，夠鐘入到診所姑娘話醫生通常係4點9才到診，坐左一陣阿B就睡醒左，醒後他完全忘記左傷痛又開始曳，玩玩下又眼訓就比左〝奶咀〞佢。我和娣婦與阿B一齊入去見醫生，我向醫生覆述一次事發經過，醫生看過後沒有大礙，開了一支鹽水滴鼻、一支jelly搽嘴、一支退燒藥止痛用的。
但我同醫生講〝頭先佢剛食過奶咀都冇事，與平時一樣〞，醫生聽到後都話阿B〝奀頗〞。
之後我地去了肥阿哥家，阿B吃奶都沒事，所有野都與沒撞傷過一樣。吃完奶、洗完白白就訓左，約一個鐘後就睡醒。
阿B訓覺前~
阿B訓醒後~
沒有留言:
發佈留言