阿B去做Test

阿B今日約左9點要去位於荔景〝分科診所及特殊教育服務中心〞做測試，係上次睇醫生寫轉介信比我地~〝剪利筋？‧流感第二針‧翻一個大斤斗〞。

我地到達已見到有幾個人排隊繳費，由於阿B係新証，所以用另一個counter不用排隊。我同阿B講有好多小朋友玩緊，佢都唔肯落地，後來我抱佢去個有玩具的櫃引佢玩，然後慢慢放佢係地，之後佢就肯行、玩。

果到有好多間房，同一時間有不同的人接見小朋友，大約半小時後到阿B喇！真係快！我地跟姑娘去到一間房，每人一張櫈，阿B都有份，原來這次是做評估，之後根據這次評估報告才決定要見那一科醫生。姑娘問左一D家庭背景、各人的身體狀況、資料後，她就拎左幾舊積木引阿B玩，然後與我地傾談。

阿B用積木敲打得太嘈時，姑娘會不出聲拎走舊積木。
我：我有疑問咁樣佢下次會唔會想要就搶？
姑娘：唔會。我都唔係搶佢，用力好細。
我：咁即係唔駛出聲，用柔和的手帶點輕力取回就可以。
姑娘：係。

叫佢做野，佢識唔識聽、做？
我：佢唔識，我地用手輕拍枱叫佢將個奶咀放枱面，佢懂這樣。
姑娘想要阿B手上的玩具，張開手掌叫〝比〞，阿B差不多放到她的手上時又拎回。然後，姑娘又用柔和的手輕輕力拎左，我覺得有點像太極，然後比佢玩一陣，再叫〝比〞，這次阿B真的比了，是第一次。

佢識唔識講野？
娣婦：比野食佢要講〝mum mum〞才比，有時都會講既。
姑娘：唔係呢D，唔係跟口水跟既，係要佢自己講既，有冇？
我：有時想要奶咀，佢會指住，有時還會講奶奶。有時想食野都會講〝mum mum〞。

咁你地而家擔心乜野？
肥仔：怕人多的地方。
我：唔講野、唔應人。
娣婦：專注力。

怕人多的地方
肥仔：佢好似怕人多既地方。
姑娘：佢係遊樂場見到小朋友有冇一齊玩？
娣婦：佢會望住D小朋友。
姑娘：咁有冇一齊玩？
娣婦：有行去玩，但唔係一齊，見到有人玩緊都要行過去。
我：出到街成日都唔應人，係屋企已經係咁。
姑娘：街有咁多新奇既事物，梗係唔應你喇！

唔講野
姑娘：而家未講野都唔算遲，佢想要果樣野時有冇講？
肥仔：唔會。
娣婦：唔會，通常會扭。
我：有時都會用手指~指，其實，佢唔駛開聲就成棚人湧埋去。
姑娘：如果佢無原無故扭既~唔好埋佢，出街你地可能會覺得〝肉酸〞，初初係屋企會扭得耐D，但佢會漸漸發覺，唉！咁樣係唔得架喎！就會冇野。

唔應人
姑娘：你地平時叫咩名？
我地：叫阿B。
姑娘：咁大個應該叫佢個名架喇！
我：有冇眼神接觸？通常都冇。
姑娘：你地好似我咁拍一拍佢，拍佢都唔望就用野吸引佢注意你，然後才同佢講。

專注力
姑娘：你諗一個17個月既小朋友可以坐定定幾耐？
娣婦：我覺得應該有5分鐘。
我：一分鐘都算多。
姑娘：姑孻就正碓，一個小朋友你要佢坐定係好難。
測試：姑娘將食物放入樽內，再倒出黎，然後再放入樽內，她要求阿B將食物由樽倒出嚟！
阿B用一隻手指伸入去拎，這個樽口太小要小朋友手指才可放入，但阿B隻手指都有D〝敏水〞，都拎到，但姑娘要倒唔係拎，所以再放入去，叫佢再倒，唉！倒到喇！叻叻！如是者做左3、4次就比佢食，枱面緊係有舖紙巾喇！
結論：姑娘要我地訓練阿B用2隻手指拎野，因為佢不是太靈活。

之後既野冇聽，因為阿B要出房外，加上眼訓咪扭，姑娘話都做完，只是講多少少野，就叫我可以抱佢，肥仔抱完，到我，娣婦聽姑娘講野，見到門口又要出去，姑娘就叫我地唔好埋佢，佢倚住度門係到喊，我怕有人開門佢會跌，就走過去，姑娘話唔好，佢關左門冇人會開門。冇人理采佢就行左去窗果邊，自己周圍探索，我地見佢攪洗手盆。
姑娘：話唔係完全唔理‧‧‧
我：我有用對眼昅住佢架，有時佢係屋企我都係咁。
姑娘：係喇！這做法就正確。
我：但係佢喊就唔可以咁！
姑娘：點解？
我：屋企老人家話唔好比佢喊，唔係就難湊。
之後真係好乖走過嚟，我地仍然冇理佢，又行開去另一到玩，然後要離開間房去另一到幫阿B度高、磅重。

阿B跟住姑娘，姑娘就拖住阿B，出到房阿B又〝賴地〞，唔行要抱，我地冇埋佢，佢一路行一路喊，又攬住我地隻腳，之後我去左厠所，返嚟以為阿B收左聲，點知仲喊緊，攪掂晒等埋姑娘影印完就走得，我地問姑娘〝佢眼訓，可唔可以比奶咀佢？〞，得~冇問題。

阿B不停指住門口示意要走，最後都和姑娘飛吻就走。