失水準的泰國餐廳

11 December 2008

尋晚頭痛十點就瞓左，半夜半醒時都感覺到仍頭痛，以為瞓醒無事，都係仲痛。今早我6點幾起身book場，入到去book極都話被人訂左，最後我就logout，再login結果我要既時間full晒~真係有D灰！

我湊完阿B返學就去〝Taste~驚喜兩日@Taste〞行下，然後再回家去整〝濃味芝士蛋糕〞。我整完餅都係2點，阿B放4點半，我又唔想再整餅，所以我就敷左個Mask，我應該有成1、2年冇敷Mask，係前排有coupon去做過一次facial咋！我冇做野後，成個人都冇保養。我做完facial relax一陣，個頭冇咁痛。今日時間好趕，湊左阿B放學，開埋奶等佢食埋，冇幫佢洗白白就走人。

今日約左好多人吃飯，大連小都成十個人。我去左〝二德惠〞買少少野，等熊貓姐姐放工，再搭車去與老公、至Fit姐姐、同屋住一家、高達叔叔、開心果姐姐吃飯。之前熊貓姐姐唔覺我瘦左，但今日佢就覺得我瘦左，我聽到真係開心。

我地搭車途中，熊貓姐姐收到開心果姐姐來電，有突發事未走得，都可能會好晏先來到，我地入坐後半至一小時就到喇！

今次呢間泰國餐廳，有次佢地來過吃，果次我地兩公婆唔得閒冇來。佢地試過話好味，下次要再來，不過，今次大失水準，若果上次係咁既水準，都唔會再來。

泰國大象啤：有男士在場少不免啤一啤佢喇！我試過冇乜特別。

泰金生蝦：肉質新鮮，個汁都好味，order左2碟。
明爐魚(烏頭)：食滿200蚊或以上就可以用一蚊吃一條〝明爐魚(烏頭)〞~如此類推，只限堂食，我地order左2條。

我地又叫左小吃，但小吃係得〝泰式鳳爪〞好味，其他都係一般。

酥炸魷魚鬚：配料多，但係好靭，高達叔叔話好似橡筋咁！

辣肉碎香葉炒飯 (雞)：有豬、牛、雞和小、中、大辣揀，我地大多是無辣不歡，所以order中辣，點知來到一D辣都冇，個飯好似糯米飯咁，又〝章〞又濕。

椰青焗飯：上次吃過好味，頭先吃辣肉碎香葉炒飯已經似糯米飯，佢仲似糯米到十足十添！雖然，有好香椰青味，但係真係又〝章〞又濕。

酸辣湯：有小、中、大辣揀，都係選中辣，可能攪得唔夠勻，所以味道不一，頭幾碗就得個鹹味，最後幾碗酸、辣都夠，最尾果碗仲好鹹添啵！但係辣都應該唔夠。

金枕頭：佢地上次都有吃，我睇到個餐牌以為係榴槤，但原來係個包中間放左咖哩，味道都OK，不過，隻大蝦老公吃左，得個樣，D肉係〝梅〞的。

呢3個餸冇乜特別，但個炒粉絲比較乾D。今餐吃左八百幾蚊，每人110都唔係好貴，下次再試多次，睇下係咪真係咁先。

熊貓姐姐想去生果舖，食完飯就一齊去，佢地都有買生果，我見盒〝士多啤梨〞8蚊，就帶左佢回家，等我諗用佢來整咩好呢？

今日既伴手禮有〝椰子圓餅〞和〝濃味芝士蛋糕〞，開心果姐姐見到以為係隻聖誕襪，熊貓姐姐即場吃左都話好味。