上海街‧牛扒餐

今日節目一改再改，前幾日我就決定去〝上海街〞買野，其實，老公唔想去，但我係都要去，佢無我符唯有遵命咋！

• 最初係去露營，但係有個朋友請不到假，所以取消左，但新年前會去多次。


• 改去睇演唱會，但因有些問題，又取消左。


• 跟手改約去唱K，但有個朋友有事不能去，又要取消。

我地3點幾先出到去〝上海街〞，頭先搭果架紅Van真係逢車過車，好亡命下。前幾日睇新聞話〝油麻地戲院〞，唔知會重建或改建給粵曲用途，因為粵曲用途既地方不夠。

我去〝上海街〞主要係買〝竹笪〞和〝豬針〞，罐頭刀係老公提我買架！因為我已經整爛左3把罐頭刀喇！有把直情被我扭甩左，分成2截，係咪好誇呢？

肥阿哥來電問：「去唔去佢家食〝牛扒餐〞？」，我地買完野又冇地方去，所以就應承左。我與老公由油麻地行去旺角搭車去，我去左旺角街市買生果，食咁多肉，食返個生果健康D。老公要食貢梨，我就想食〝車厘子〞，買左半磅怕唔好吃，橙就買回家既。

開餐前睇〝盜墓迷城 3〞，我覺得〝李連杰〞做既角色太誇張喇！同埋成套戲好似港產片，雖然，有外國人，但香港藝人佔既戲份都好多，我更估唔到〝粱洛施〞有咁多戲份，不過，呢套戲係誇D，但都係一部好戲來的。

上次Benz哥哥想BBQ，但人小，所以就買左個韓式烤盤，來代替BBQ。今次我地就係用佢來烤〝牛扒餐〞，不過，烤完成間屋都有好濃烈〝牛脂肪味〞。食完緊係要洗碗喇！今次我就爭輸左比阿嫂，咁我就去削生果比大家吃嘞！