平淡倒數日@2008

今日係2008年最後一日，而緊接明天就係我與老公踏入拍拖十週年，但今、明兩日都可能會好平淡咁渡過。

阿B病左有一個星期有多冇返學，今早佢瞓到成十點先起身，佢有微微燒，但我冇餵退燒藥，只係餵左其他藥。我見今日要全日要留守娘家，所以決定煮個〝碗仔翅〞做Tea，阿婆聽到即刻話好，我都有好耐冇係屋企煮野，除左夜晚晚餐外。

今次呢個〝碗仔翅〞煮得稀左D，但阿公和阿婆都話唔稀，我用馬蹄粉埋獻，可能阿婆心理作用話好甜好味。娣婦放早回來吃左兩碗添！肥仔仲誇佢將餘下的吃光，我諗都有3-4碗麵碗，我都拎左碗比老公。

夜晚我忙完煮餸，又忙老公個飯壺，然後先可以食飯，跟住又背住沉重既背囊，其實每晚如事，在沉重路途上收到老公電話，佢剛落車就相約去〝80M〞訂巴士，然後一齊回家，老公見到我背住沉重背囊，都叫我唔好拎飯比佢，但我冇回應，心想唔拎比你你又係食街外買或煮麵，試問我又點忍心呢！

晏晝12點幾阿B又再瞓，佢用口呼吸，又瞓得唔冧，2點幾佢又燒到103度幾，我就塞左粒退燒藥，我未塞佢就醒左，我拍左好耐佢都未瞓得返，但佢又唔肯起身，叫阿婆拍住佢瞓，阿B又唔肯，指定要我，最後我要去煮〝碗仔翅〞，就叫阿公拍佢，約4點瞓左，瞓到5點半起身，明天再去覆診，希望阿B好快好返喇！